დავით არახამიას განცხადებებმა დაადასტურა, რომ ზელენსკის და მის გუნდს არ უნდა საქართველომ კანდიდატის სტატუსი მიიღოს – ასეთია საპარლამენტო უმრავლესობის შეფასება. დავით არახამიამ ინტერვიუ ერთ-ერთ ქართულ ტელეარხს მისცა და თქვა, რომ საქართველოში მთავრობა უნდა შეიცვალოს, სხვაგვარად ქვეყნის ევროკავშირში ინტეგრაცია წარმოუდგენელია.
არახამიას განცხადებას თბილისში მწვავე შეფასებები მოყვა. “ქართული ოცნების” თავმჯდომარე, ირაკლი კობახიძე მიიჩნევს, რომ “რადიკალურ ოპოზიციას” საქართველოსთვის კანდიდატის სტატუსის დაბლოკვა უკრაინის ხელისუფლების მეშვეობით სურს.
“გუშინ რადიკალური ოპოზიციის ერთ-ერთი ლიდერი გამოვიდა და თქვა ასეთი რაღაც, რომ ზელენსკის შეუძლია დაბლოკოს საქართველოსთვის კანდიდატის სტატუსი. ვიღაცებს ამის იმედი აქვთ, მათ შორის, უკრაინის ხელისუფლება იქნება გამოყენებული კანდიდატის სტატუსის დასაბლოკად.
რაც შეეხება პირადად არახამიას, მას არ აქვს სამშობლო – არც უკრაინაა მისი სამშობლო, არც საქართველო, არც რუსეთი – არცერთი სამშობლო არ აქვს მას. აქედან გამომდინარე, ის მოქმედებს არა რაღაც პატრიოტული ინტერესების კარნახით უკრაინის ან საქართველოს მიმართ, ის მოქმედებს სხვა ინტერესების კარნახით, რაზეც არ მინდა დეტალებზე საუბარი, მაგრამ, სამწუხაროდ, ეს კაცი ვერ იქნება ვერანაირად ღირებული იქიდან გამომდინარე, რომ მას სერიოზული პრობლემები აქვს.
რადიკალურ ოპოზიციას აქვს იმედი, რომ ჩვენთვის კანდიდატის სტატუსის მინიჭება დაიბლოკება უკრაინის ხელისუფლების მეშვეობით. რადიკალურ ოპოზიციას აქვს იმედი, რომ ერთ-ერთი, ვინც განახორციელებს უარყოფით ზემოქმედებას ჩვენთვის კანდიდატის სტატუსის მონიჭებაზე, იქნება უკრაინის ხელისუფლება. ბუნებრივია, ისინი ყველაფერს გააკეთებენ ამისთვის – გამოიყენებენ არახამიას, იგივე დანილოვს, რომელიც საქართველოში ითხოვდა მეორე ფრონტის გახსნას, პოდოლიაკს, რომელიც ითხოვდა საქართველოში მეორე ფრონტის გახსნას, მაგრამ მე იმედი მაქვს, რომ მაინც საქართველოს მიენიჭება კანდიდატის სტატუსი,”-განაცხადა ირაკლი კობახიძემ.