არა მგონია ვაშაძესთან ერთობამ რაიმე ტიპის ჩრდილი მიაყენოს მერაბიშვილ-კეზერაშვილის მმართველობას „ნაციონალურ მოძრაობაში“, – ამის შესახებ თავდაცვის ყოფილმა მინისტრმა და არასამთავრობო ორგანიზაცია „სამოქალაქო იდეის“ თავმჯდომარემ, თინა ხიდაშელმა „პალიტრანიუსის“ ეთერში განაცხადა.
როგორც მან აღნიშნა, ამ პროცესიდან მთავარი მოგებული გიორგი ვაშაძეა.
„არა მგონია ვაშაძესთან ერთობამ რაიმე ტიპის ჩრდილი მიაყენოს მერაბიშვილ-კეზერაშვილის მმართველობას „ნაციონალურ მოძრაობაში“. არ არის ვაშაძე იმ პოლიტიკური წონის ფიგურა, რომ მან გადაწონოს გნებავთ ადეიშვილ-მერაბიშვილის ფაქტორი და გნებავთ თავად მიხეილ სააკაშვილის ფაქტორი. „ნაციონალურ მოძრაობას“ მხოლოდ ის გააკეთილშობილებს, თუ უცებ აღმოჩნდება მათ წიაღში ვინმე ისეთი ტიპის და წონის პოლიტიკოსი, რომელმაც შესაძლოა საზოგადოების განწყობებში განცდა გააჩინოს, რომ მის სიტყვას უფრო მეტი ფასი აქვს, ეს ამ შემთხვევაში სახეზე არ გვაქვს. ამ პროცესიდან მთავარი მოგებული არის თავად ვაშაძე, რადგან იმ პირობებში, როდესაც მას ინდივიდუალურად პოლიტიკურ ასპარეზზე დარჩენის შემთხვევაში ბარიერის პრობლემა ექნებოდა, დღეს მას ეს პრობლემა აღარ ექნება“, – განაცხადა ხიდაშელმა.
შეგახსენებთ, რომ „ნაციონალურმა მოძრაობამ“ და „სტრატეგია აღმაშენებელმა“ ახალი პოლიტიკური პლატფორმის შექმნის შესახებ გუშინ, 20 ივლისს განაცხადეს.