“ნაცმოძრაობას“ ამხელა ხმაზე ლაპარაკის უფლება ამ საკითხთან დაკავშირებით არ აქვს”

„ნაციონალურ მოძრაობას“ ამხელა ხმაზე ლაპარაკის უფლება ამ საკითხთან დაკავშირებით არ აქვს”, – ამის შესახებ ექსპერტმა მამუკა არეშიძემ ქართველი ოფიცრის, გია ცერცვაძის დაკავების საკითხზე ოპოზიციის მხრიდან ხელისუფლების მისამართით გამოთქმული კრიტიკის თაობაზე განაცხადა.
არეშიძე „ კვირასთან“ საუბარში გია კრიალაშვილის და სხვა სამხედროების საქმეებს იხსენებს.
„არაერთი ჯარისკაცის გამოხსნაზე მიზრუნია პროკურატურის კლანჭებიდან, ყოფილი ხელისუფლების პერიოდში. შემიძლია გითხრათ, რომ ეს იყო რამდენიმე ტანკისტი, წარმოშობით სამაჩაბლოდან და ამიტომ გამომივიდა მათი გამოხსნა, რომ სამაჩაბლოს მკვიდრნი იყვნენ. აღარ ჩამოვთვლი იმ წლებში დახოცილ სხვა ოფიცრებს. იგივე ჩემი მეგობარი, გია კრიალაშვილი და რომელი ერთი დავასახელო კიდევ. ამ პოლიტიკურ ძალას -„ნაციონალურ მოძრაობას“ ამხელა ხმაზე ლაპარაკის უფლება ამ საკითხთან დაკავშირებით არ აქვს“, – განაცხადა მამუკა არეშიძემ.
რაც შეეხება გიორგი ცერცვაძის საქმესთან დაკავშირებით საქართველოსა და უკრაინის ხელისუფლებების პოზიციებს, არეშიძის თქმით, ორივე მხარე მოწოდებულია იმისკენ, რომ გიორგი ცერცვაძე რუსეთს არ გადაეცეს. არეშიძე მიიჩნევს, რომ მაღალი საზოგადოებრივი ინტერესიდან გამომდინარე, საქართველოს პროკურატურამ უნდა მიმართოს უკრაინის პროკურატურას და გამოითხოვოს ინფორმაცია, კონკრეტულად რა დანაშაულისთვის იძებნებოდა ცერცვაძე რუსეთის მიერ.
„გიორგი ცერცვაძეს აქვს ისეთი ბიოგრაფია (საზოგადოებისათვის რაც არის ცნობილი), რომელიც მის მიმართ ქართული და უკრაინული საზოგადოების განსაკუთრებულ დამოკიდებულებას განაპირობებს. პირველ რიგში, მინდა ხაზი გავუსვა უკრაინული საზოგადოების და უკრაინის ხელისუფლების პოზიციას. როგორც ჩანს, რუსებისთვის ცერცვაძის გადაცემას არავინ აპირებს, ამას მოწმობს უკრაინის გენერალური პროკურორის, ლუცენკოს განცხადება. შესაბამისად, ვფიქრობ, ეს ამბავი ოპოზიციის მიერ – „ნაციონალური მოძრაობა“ იგულისხმება, ბუნებრივია – ჭიქა წყალში ქარიშხლის ატეხას უფრო ჰგავს. ერთი ძალიან საინტერესო ეპიზოდია და მინდა ყურადღება გავამახვილოთ: საქმე ის არის, რომ დღეს, როდესაც ხდება უკრაინის შეიარაღებული ძალების მიერ ზოგიერთი პუნქტის დაკავება, ეს ძალიან მძიმე შეტაკებებით ხასიათდება. აი, ზუსტად ამ მახვილის წვერზე არის გადასროლილი ქართული ლეგიონი და აი, ამ პერიოდში აპატიმრებენ მის ერთ-ერთ წარმომადგენელს, ეს არის ერთგვარი ნონსენსი“, -განაცხადა არეშიძემ.
მისივე თქმით, აღნიშნული ფაქტორიდან გამომდინარე,უკრაინული საზოგადოება კიდევ უფრო აქტიური უნდა იყოს.
„უკრაინის საზოგადოებამ და ხელისუფლების ნაწილმა შესაბამისი რეაგირება მისცა, მე ასე მგონია, მაგრამ უფრო აქტიურები უნდა იყვნენ. ეს ხალხი იქ ჩასულია იმისთვის, რომ მათი ტერიტორიული მთლიანობა დაიცვას. აქედან გამომდინარე, ბევრად უფრო მეტი გულისხმიერებით უნდა მოეკიდონ ამ ყველაფერს. რაც შეეხება ჩვენი ხელისუფლების პოზიციას, მე რამდენადაც ვიცი, გენერალურ პროკურორს და სხვადასხვა სამსახურის წარმომადგენლებს უკრაინელებთან საუბარი ჰქონდათ. ლუცენკოს განცხადებიდან გაირკვა, რომ მიუხედავად სასამართლო გადაწყვეტილებებისა, გენერალურ პროკურატურა თავის პოზიციაზე მყარად დგას. ძალიან დიდი მნიშვნელობა აქვს იმას, რომ ამ ადამიანის – გიორგი ცერცვაძის ბიოგრაფია გავყოთ. ერთია 2008 წლის ეპიზოდი, როდესაც მან ჩვენი ქვეყნისთვის ძალიან მნიშვნელოვან დღეებში გამოიჩინა თავი და მეორე ის, თუ რა მოხდა 2003 წელს. მაგალითად, მე პირადად, არ ვიცი, ზუსტად რა მოხდა 2003 წელს. აქედან გამომდინარე, საქართველოს გენერალური პროკურატურის ერთ-ერთი უმნიშვნელოვანესი ამოცანაა შემდეგი: თუ თვითონ არ აქვთ ინფორმაცია, უკრაინის პროკურატურიდან მაინც უნდა მიეღოთ ინფორმაცია, რის საფუძველზე მოხდა ცერცვაძის დაპატიმრება და ჩვენს პროკურატურას უნდა გაევრცელებინა ეს ინფორმაცია, თუ რა წერია იმ დოკუმენტში, რომელიც უკრაინელებმა მიიღეს, რომელ მკვლელობაზეა ლაპარაკი, როგორ მოხდა ეს ყველაფერი და ა.შ. ეს ძალიან მნიშვნელოვანი რამ არის, მაღალი საზოგადოებრივი ინტერესიდან გამომდინარე, ამის გაკეთება აუცილებელია. ვიღაცა იტყვის, რომ ვთქვათ, დანაშაული მოხდა 12 წლის წინ და ცერცვაძემ მას მერე არაერთხელ გამოისყიდა ეს თავისი მოქმედებით. კი ბატონო, მაგრამ საზოგადოებამ სიმართლე მაინც უნდა იცოდეს. გიორგი ცერცვაძე არის საქართველოს მოქალაქე და საქართველოს ნებისმიერი მოქალაქე, რომელსაც აქვს გარკვეული ბიოგრაფია დაკავშირებული ქვეყნის ტერიტორიული მთლიანობისთვის ბრძოლასთან, უნდა იყოს საქართველოს ნებისმიერი მთავრობის ინტერესის საგანი. პროკურატურის მოქმედებიდან გამომდინარე, მე არ მაქვს საფუძველი, რომ ხელისუფლება არ იცავს გიორგი ცერცვაძეს, მაგრამ ხომ ხედავენ, რომ მაღალი ინტერესია საზოგადოებაში. იგივე მაისურაძესთან დაკავშირებით, მახსოვს, მაშინ საელჩოც იყო ჩართული“, – განუცხადა „კვირას“ მამუკა არეშიძემ.