რამდენიმე დღის წინ რუსთავის საწარმო “აზოტიდან” 350 თანამშრომელი გაათავისუფლეს. გათავისუფლებულებმა ცოტა ხნის წინ აქცია გამართეს.
აქციაში გათავისუფლებული თანამშრომლები, სტუდენტური და არასამთავრობო ორგანიზაციების წარმომადგენლები ესწრებოდნენ.
როგორც ჟურნალისტებს აქციის მონაწილეებმა განუცხადეს, 350 ადამიანი ყოველგვარი ახსნა-განმარტების გარეშე გაათავისუფლეს.
„მივედით სამსახურში და ვნახეთ, რომ ჩვენი საშვები გაუქმებული იყო. მოვითხოვეთ ახსნა-განმარტება, თუმცა, არავის არაფერი აუხსნია. ჩვენ აუცილებლად გავაგრძელებთ საპროტესტო აქციებს და მოვითხოვთ ჩვენი უფლებების დაცვას”, – აცხადებენ „რუსთავის აზოტიდან“ გათავისუფლებული თანამშრომლები.
მათი თქმით, გათავისუფლების პროცესი მას შემდეგ დაიწყო, რაც „რუსთავის აზოტი“ „საქართველოს ბანკის“ მფლობელობაში გადავიდა. აქციის მონაწილეების ინფორმაციით, სულ „რუსთავის აზოტიდან“ 700-ზე მეტი თანამშრომლის გათავისუფლება იგეგმება.
გარდა ამისა, პროფკავშირები მიუთითებენ, რომ თანამშრომლების გათავისუფლების გარდა, „რუსთავის აზოტის“ მფლობელები მუშების უფლებებს კაბალური კონტრაქტებით არღვევენ, რომელსაც მოქმედ თანამშრომლებს უდებენ. გათავისუფლებული თანამშრომლები აპირებენ სასამართლოს მიმართონ.
გათავისუფლებულებმა აქცია ხვალ 9 საათზე რუსთავის “აზოტთან” დააანონსეს. ისინი სამსახურში აღდგენას უკვე ქარხანასთან მოითხოვენ. თავად ქარხანაში ამბობენ, რომ თანამშრომლები არ გაუთავისუფლებიათ და ახალ ხელშეკრულებებზე მუშაობენ.