მამუკა მდინარაძე ,,ოცნების” ერთ-ერთი ახალი სახეა, რომელიც მმართველმა პარტიამ ყრილობაზე წარადგინა. გამოცდილი იურისტი საკუთარ თავს დღეს საპარლამენტო ცხოვრებაში ხედავს, თუმცა ცოტა ხნით ადრე უზენაესი სასამართლოს თავმჯდომარეობის სურვილიც ჰქონდა და ადვოკატთა ასოციაციის პრეზიდენტობისაც. ამბობს, რომ ,,ქართულ ოცნებას” საკუთარი თავი თავად შესთავაზა, თუმცა პოლიტიკურ კულუარებში მას ყოფილი მთავარი პროკურორის, ოთარ ფარცხალაძის პროტეჟედ მოიხსენიებენ. კიდევ ერთი განცხადება, რაზეც ,,ადვოკატთა ალიანსის” დამფუძნებელს ყოველდღიურად უწევს პასუხის გაცემა, წარსულში მისი ნასამართლეობაა. ყველა ბრალდებას, მითებსა და რეალობას ,,ვერსიისთვის” ,,ოცნების” პოლიტსაბჭოს წევრი, მამუკა მდინარაძე პასუხობს და განმარტავს _ რა აკავშირებს ირაკლი ოქრუაშვილთან, ვანო მერაბიშვილსა და დავით კეზერაშვილთან, რის გამო იჯდა ციხეში 10 დღე და რეალურად, ვისი პროტეჟეა ,,ოცნებაში”:
_ პოლიტიკური წარსული არ მაქვს, მაგრამ ოპოზიციური განწყობა ნაციონალური მოძრაობის დროს ნამდვილად მქონდა. რეალურად, პირველი ადამიანი ვიყავი, ვინც ე.წ. საერთო პოლიტიკას არ დაემორჩილა. ეს 2004 წელს მოხდა, როცა ბათუმში ,,კმარელების” დაკავების სანაცვლოდ, თბილისში დაკავებული ორი ბათუმელი სტუდენტი არ უნდა გაგვეშვა. არც დავფიქრებულვარ, როცა ქეთი ბექაური მოვიდა და მათი გაშვება გვთხოვა, ისე გავეცი ნებართვა, ჩემი საქციელი კი ,,დანაშაულებრივ გულგრილობად” შეფასდა.
_ თავიდანვე იმით დაიწყეთ, რასაც ოპონენტები მთავარ ბრალდებად გიყენებენ _ ნასამართლეობის თემა. გაწუხებთ ეს ჭორი?
_ არ მინდა ჩემს თავზე ზედმეტი რაღაცების მოყოლა, მაგრამ ეს თემა არათუ მაწუხებს, იმ დროს ქუჩაში რომ გამოვდიოდი, ვიღაცები მხვდებოდნენ და გმირს მიწოდებდნენ. რეალურად, მაშინ მე და კიდევ 2 ადამიანი პირველები წავედით სისტემის წინააღმდეგ. 10 დღე ვიყავით ციხეში. სხვათა შორის, მაშინ ირაკლი ოქრუაშვილი იყო პირველი ადამიანი ნაციონალების გუნდში, ვინც თქვა, მოდი, ეს ხალხი გავათავისუფლოთო და ეს სწორი სვლა იყო, რადგან ჩვენს დაკავებას საზოგადოების ნეგატიური გამოხმაურება მოჰყვა. მაშინ გამომძიებლების 99%-მა სამსახურიდან წასვლის თაობაზე განცხადება დაწერა, რაც სისტემის კოლაფსს ნიშნავდა. შესაბამისად, რაკი ამ საქმეს ამხელა რეზონანსი მოჰყვა, გაგვათავისუფლეს, თუმცა მერე ზურაბ ადეიშვილი დაინიშნა გენერალურ პროკურორად და ეს საქმე ,,ვითარების შეცვლის გამო” შეწყვიტა. ადეიშვილმა ვითარება ისე გამოიყვანა, ვითომ სახელმწიფომ გვაპატია და გათავისუფლება დაგვამადლა. თუმცა ჩვენ არ გავჩერდით, მეორე და მესამე ინსტანციაში წავედით, გამამართლებელი განაჩენები გამოიტანეს და რა თქმა უნდა, გამართლებულ ადამიანს არც ნასამართლეობა აქვს. თუმცა ვერ ვიტყვი, რომ ამის მერე ნაციონალებმა განსაკუთრებით ამომიჩემეს. ეს კი ჩემი პირველი შეხებაა პარტიასთან, თუ 2012 წელს არ ჩავთვლით, როცა ,,ოცნების” რიგითი ჯარისკაცი ვიყავი და სამეზობლოში, სანაცნობოში, სანათესაოში აქტიურად დავდიოდი და ვამბობდი, საქართველოს გადარჩენის ერთადერთი გზა ,,ოცნებაა”-მეთქი.
_ 4 წელი რას ელოდებოდით, თავიდანვე რატომ არ მოხვედით პოლიტიკაში კოალიციასთან ერთად ან საერთოდ, რატომ დათმეთ წარმატებული კარიერა პოლიტიკის გამო?
_ ეს კითხვა შეიძლება მაშინ დასმულიყო, თუ კიდევ 4 წლის მერე მივიღებდი ამ გადაწყვეტილებას. 3-4 წლის წინ არ მიმაჩნდა, რომ მზად ვიყავი ამისთვის და ახლაც ძალიან ბევრი ვიფიქრე. ვიცოდი, ვიღაცები ნასამართლეობას დამაბრალებდნენ და ეს შეიძლება 10 კაცს მაინც დაეჯერებინა. ბევრი კლიენტი მყავს და იმისთვისაც მზად ვიყავი, ვიღაც ჩემი კლიენტების სახელით დაიწყებდა საუბარს. დასამალი რაა _ მაქვს ამბიცია და იმიტომაც მოვედი პოლიტიკაში, რომ ხალხს გამოვადგე. ამის გაკეთება კი, ჩემი პროფესიით, მხოლოდ ერთეული ადამიანებისთვის შემიძლია. ჩემთვის ერთ-ერთი სტიმული ისიც იყო, რომ ბევრი ადამიანი მეუბნებოდა, პოლიტიკაში რატომ არ მოდიხარო.
_ მართალია, რომ ,,ოცნებას” თქვენი თავი აქეთ შესთავაზეთ?
_ რაოდენ გასაკვირიც უნდა იყოს, ასეა… ჩემი სურვილი კახა კალაძეს შევუთვალე. ერთი ახლობელი ადამიანი მოჰყვა ჩემს კლიენტს. ისე მოხდა, რომ პოლიტიკაზე ვისაუბრეთ და საუბრის ბოლოს ვთხოვე, კალაძისთვის გადაეცა, ჩემნაირი ხალხი თუ სჭირდებათ, გვერდით დავუდგები-მეთქი. დაახლოებით 2 კვირაში წაიღეს ჩემი სივი. რაღაც პერიოდის მერე დაიწყო შეხვედრები, დისკუსიები, იყო კითხვები საგარეო კურსზე, ჩემს წარმოდგენებზე, რას შევცვლიდი ჩემს სფეროში და ა.შ. შევხვდი პრემიერ გიორგი კვირიკაშვილს, კახა კალაძეს, პარტიის აღმასრულებელ მდივან ირაკლი კობახიძეს.
_ ბიძინა ივანიშვილს თუ შეხვდით და საერთოდ, რა გავლენას ახდენს ივანიშვილი პოლიტსაბჭოსა და სიის დაკომპლექტებაზე?
_ ბიძინა ივანიშვილი სულ ორჯერ მყავს ნანახი, ერთხელ ახლობლის პანაშვიდსა და მეორედ ,,ოცნების” ყრილობაზე, როცა პოლიტსაბჭოს წევრობა მომილოცა. ჩემთვის არავის უთქვამს, რომ გუნდში ჩემი ყოფნის გადაწყვეტილება მასთან უნდა შეთანხმებულიყო. რეალურად, შერჩევა ხანგრძლივი და დემოკრატიული პროცესი იყო, კანდიდატებთან ერთობლივი შეხვედრები, მსჯელობა, დისკუსიები ტარდებოდა.
_ ისე, როგორც ამბობენ, ყოფილი მთავარი პროკურორის, ფარცხალაძის პროტეჟე ხართ, მან გაგიწიათ რეკომენდაცია ,,ოცნებაში”?
_ ფარცხალაძეს, როგორც ივანიშვილს, სულ 2-3-ჯერ ვარ შენახვედრი, ისიც სუფრასთან. ბოლოს ფარცხალაძე დაახლოებით 2 წლის წინ ვნახე და შორიდან მივესალმე. ამას გულწრფელად ვამბობ და პასუხსაც ვაგებ ყველა ადამიანის წინაშე საქართველოში.
_ მითი კი ასეთია: ,,ოცნების” ახალი სახე ნასამართლევი ფარცხალაძის ნასამართლევი პროტეჟე მდინარაძეაო.
_ ჩემი ,,ნასამართლევობის” შესახებ უკვე მოგიყევით, ჩემი ,,პროტეჟეობის” შესახებაც. მთელი პასუხისმგებლობით ვამბობ, რომ ოთარ ფარცხალაძესთან არაფერი მაკავშირებს. მოდით, პირდაპირ გეტყვით:
ოთარ ფარცხალაძე არის ჩემი რამდენიმე მეგობრის მეგობარი; ასევე ნიკა მელია არის ჩემი მეგობრის მეგობარი, დავით ბაქრაძე ჩემი გარდაცვლილი ძმაკაცის დის ქმარია. ირაკლი კობახიძე ჩემი კურსელია, კახა კალაძე ჩემი კლიენტის მეგობრების მეგობარია _ საქართველო პატარა ქვეყანაა! ისე კი, სულ სამი დღეა პოლიტიკაში ფეხი შემოვდგი და უკვე მაქვს ინფორმაციები, როგორ ეკითხებიან ჩემს კლიენტებს ვიღაცები, მამუკა მდინარაძესთან რამე პრეტენზია ხომ არ გაქვთო.
_ მერე, რაიმე საქმის ან რომელიმე კლიენტის გამო ხომ არ შიშობთ?
_ არავითარ შემთხვევაში… ყველა საქმეს კეთილსინდისიერად წარვმართავ და ასეც ვაპირებ გაგრძელებას მთელი დარჩენილი ცხოვრება.
_ თქვენი ცნობილი საქმეებისა და ცნობილი კლიენტების შესახებაც მიამბეთ.
_ ბოლო პერიოდში მქონდა ,,სიტი პარკის” საქმე.
არ დაგიმალავთ, ჩართული ვიყავი ალექსანდრე ნინუას საქმეშიც, რაც მასმედიამ დავით კეზერაშვილთან დააკავშირა; ასევე ჩართული ვიყავი ლევან თუმანიშვილის საქმეში და ეს უკვე მერაბიშვილს დაუკავშირდა; გარდა ამისა, ჩართული ვიყავი ოქრუაშვილის დაცვის უფროსის საქმეშიც, რაც მისი გამამართლებელი განაჩენით დასრულდა.
მაშინ ამაზე არ მიფიქრია, მაგრამ დღეს ეს საქმე იმის დასადასტურებლად გამომადგება, რომ რევანშისტული განწყობა არასდროს, არავის მიმართ მქონია. ნაციონალიც დამიცავს, ოქრუაშვილის თანაპარტიელიც, სხვა პარტიის წარმომადგენელიც… არც ერთ საქმეზე უკან არ დამიხევია, რადგან ადვოკატი ვიყავი და ეს იყო ჩემი საქმე.
_ მახსოვს, ადვოკატთა ასოციაციის პრეზიდენტობაც გინდოდათ და ამ პროცესმა პოლიტიკური ელფერი მიიღო. რა მოხდა მაშინ რეალურად?
_ ამასაც ღიად ვიტყვი: როცა არჩევნებში ვმონაწილეობდი, რბილად რომ ვთქვათ, შეთავაზება მივიღე, გამეხლიჩა ადვოკატთა ასოციაცია. ვიცოდი, უშუალოდ არჩევნების წინ კონკრეტულ მესიჯებს მივიღებდი, წინასწარ ავიღე ავსტრიის ბილეთები, გავფრინდი ვენაში და კვირაზე მეტი იქ გავატარე, ხოლო როცა ყველაფერმა გადაიარა, ჩამოვედი საქართველოში _ 2009 და 2012 წელსაც პირველი ვიყავი, ვინც ზაზა ხატიაშვილს გამარჯვება მიულოცა.
_ ცნობილია, რომ უზენაესი სასამართლოს თავმჯდომარეობაც გსურდათ. ვინ წარადგინა თქვენი გვარი პრეზიდენტთან და რატომ ვერ მოხვდით ამ პოსტზე?
_ არასამთავრობო ორგანიზაცია ,,ადვოკატთა ალიანსმა”, მედიაციის ცენტრმა, სამეცნიერო წრეებმა წარმადგინეს. შემდეგ საზოგადოების ცნობილმა სახეებმა, ხელოვანებმა გააკეთეს მიმართვა პრეზიდენტის სახელზე. ვფიქრობ, შერჩევის პროცესი ძალიან დემოკრატიული იყო, მაგრამ კანდიდატებს მხოლოდ 2 წუთი გვქონდა ჩვენი თავის, პოზიციების წარმოსადგენად. ცუდის თქმას ნამდვილად არ ვაპირებ, უბრალოდ, ეს არ ჰგავდა შეხვედრებს ,,ოცნებაში”, სადაც საათები გვქონდა მსჯელობისა და დისკუსიებისთვის.
_ ალბათ, თქვენს თავს სასამართლო სისტემაში უფრო ხედავდით, ვიდრე პოლიტიკაში.
_ ასე ცალსახადაც ვერ ვიტყვი, რადგან თავს ადამიანის უფლებათა დაცვის ან იურიდიულ საკითხთა კომიტეტშიც ვხედავ.
_ ანუ ახლა, შეიძლება, ,,მომავალ ხმალაძეს” ვესაუბრები?
_ ასე არაა… ვიქნები გუნდთან, ვიბრძოლებ მათთან ერთად არჩევნებზე და სადაც საჭირო იქნება, იქ გავაგრძელებ ხალხის სამსახურში ყოფნას. უბრალოდ, სიმართლე გითხრათ, თავს უფრო პარლამენტში ვხედავ, თუმცა იმას აპრიორი არ ნიშნავს, რომ ვინც პოლიტსაბჭოშია, ავტომატურად მოხვდება სიაშიც.
_ საინტერესოა, როგორც იურისტს, რა პრეტენზიები გაქვთ ,,ოცნებასთან” გარდა იმისა, რომ პიარში მოიკოჭლებენ. ამის შესახებ თქვენც განაცხადეთ და თავადაც იციან.
_ ჩემს შეფასებას თუ დავაზუსტებ, საქმე ისაა, რომ ვფიქრობ, საქართველოში ძლიერი ოპოზიციური პარტიები არ არის, თუმცა არსებობენ ოპოზიციური, ძალიან ძლიერი, პროფესიონალი ჟურნალისტები და მედიასაშუალებები. ოპოზიციის საქმეს ისინი აკეთებენ და მადლობაც კი უნდა ვუთხრათ, ასეთ ოპონირებას რომ უწევენ ,,ოცნებას”, ითავსებენ ოპოზიციური პარტიების როლს და ხელისუფლებას მუდმივი დაძაბულობის რეჟიმში ამყოფებენ; ამ რეჟიმში კი ,,ოცნება” გაცილებით ნაკლებ შეცდომას უშვებს. რაც შეეხება უშუალოდ შენიშვნებს, უკვე პარტიის ნაწილი ვარ და აჯობებს, ამ თემაზე ,,ოცნების” ოპონენტებმა ისაუბრონ.
_ ასე არ გამოვა, რადგან ყველას აინტერესებს, რას ფიქრობთ ე.წ. კაბელების საქმეზე და ცვლილებაზე საკონსტიტუციო სასამართლოს შესახებ კანონში.
_ საკონსტიტუციო სასამართლოსთან მიმართებაში ერთი კითხვა მაქვს _ როცა ოპონენტები კანონიერებასა და სამართლიანობაზე საუბრობენ, ყოველთვის ამბობენ, ამ საკითხს ლეგიტიმურობა აკლიაო.
_ მაგრამ მარტო კვორუმი ხშირად არ უდრის ლეგიტიმურობას… მთავარი დაპირისპირება სწორედ კვორუმის გაზრდამ გამოიწვია, რის გამოც, შესაძლოა, სასამართლოს მუშაობა შეფერხდეს.
_ თუ სხვაგან ძალიან მაღალი კვორუმი უდრის ლეგიტიმურობას, რატომ არაა ასე სასამართლოში? ამ თემაზე დეტალური ინფორმაცია არ მაქვს, თუმცა ეს კითხვა ნამდვილად მიჩნდება _ რატომ აპელირებენ ამ საკითხზე და რატომაა საკონსტიტუციო სასამართლოში მაღალი კვორუმი დამღუპველი. რაც შეეხება ე.წ. კაბელების საქმეს, დეტალებს არ ვიცნობ, მოქალაქის პოზიციიდან კი ვიტყვი, რომ, თუკი ბრალდებულებსა და პარტიაზე პოლიტიკური ზეწოლა იყო, მაშინ ეს 5 ადამიანი გარეთ საერთოდ არ უნდა ყოფილიყო. ჯერჯერობით, ვნახე პროკურატურის მიერ გავრცელებული ერთი ვიდეორგოლი და ასევე ვისმენ მეორე მხარის არგუმენტებს, ინფორმაციის დონეზე, თუმცა ვფიქრობ, ბრძოლის გაგრძელება სასამართლოებში შეიძლება. ამ ადამიანებს ვურჩევ, ასე არ დატოვონ ეს საქმე, ბრძოლა სასამართლოს სხვა ინსტანციებში განაგრძონ და თუკი ისინი მართლები არიან, არ მგონია, გამამტყუნებელი განაჩენი გამოუტანონ, მით უმეტეს, მათ ადვოკატებს პროფესიონალიზმი ნამდვილად არ აკლიათ.