ტრეფიკინგის ბრალდებით დაკავებული პირები ბრალდებას არ აღიარებენ და თავს უდანაშაულოდ მიიჩნევენ.
დაკავებულთა შორის არიან საქართველოსა და უცხო ქვეყნის მოქალაქეები. გამოძიებით დგინდება, რომ ბრალდებულები დაზარალებულებს მოწყალების თხოვნას აიძულებდნენ და მიღებულ თანხებს თავად ეუფლებოდნენ.
ადვოკატები გამოძიების ვერსიას არ იზიარებენ. უცხო ქვეყნის მოქალაქის უფლებების დამცველი, აცხადებს, რომ მისმა დაცვის ქვეშ მყოფმა სრულიად უსასყიდლოდ შეიფარა ერთ-ერთი დაზარალებული და ძალადობას ადგილი არ ჰქონია.
დაკავებული საქართველოს მოქალაქის ადვოკატი კი აცხადებს, რომ ბრალდებული არავის ზედამხედველობას არ ახორციელებდა. იგი ტაქსის მძღოლია და საკუთარ მოვალეობას ასრულებდა.
„არცერთ ბრალდებული ჩადენილ დანაშაულს არ აღიარებს და თავს უდანაშაულოდ ცნობენ. როგორც თავად აცხადებენ, არანაირი სახის ტრეფიკინგთან მონაწილეობა არ აქვთ.
ქალბატონი და ერთ-ერთი დაზარალებული წლებია ერთად ცხოვრობენ, ყოველგვარი სასყიდლის გარეშე. ვინაიდან ამ პიროვნებას არც სახლი აქვს და არც კარი, დაახლოებით 3 წელია ერთ ბინაში ცხოვრობენ.
მტკიცებულებები რაც შევისწავლეთ, არანაირი სახის დანაშაულებრივი ქმედება მათ არ უდასტურდებათ“, – განაცხადა ერთ-ერთმა ადვოკატმა.
შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს ტრეფიკინგის და უკანონო მიგრაციის წინააღმდეგ ბრძოლის სამმართველოს თანამშრომლებმა, ოპერატიული და საგამოძიებო მოქმედებების შედეგად, 4 პირი დააკავეს. გამოძიება საქართველოს სისხლის სამართლის კოდექსის 143-ე პრიმა მუხლის მეორე და მესამე ნაწილით მიმდინარეობს.