საზოგადოებრივი მაუწყებლის ჟურნალისტი გადაცემა ”რეალურ სივრცის” ავტორს სოლიდარობას უცხადებს. ჟურნალისტი “ფეისბუქის” საკუთარ გვერდზე წერს, რომ გადაცემის დახურვა არასწორი გადაწყვეტილებაა და თუ “საზოგადოებრივი მაუწყებელი” “რეალურ სივრცეს” შეელევა, ამით ტელევიზია დაზარალდება და არა – გადაცემა.
“თუ “საზოგადოებრივი მაუწყებელი” “რეალურ სივრცეს” შეელევა, ამით ტელევიზია დაზარალდება და არა – გადაცემა. დარწმუნებული ვარ, პროფესიონალთა გუნდს, ვინც ამ საინტერესო და სასარგებლო პროექტს ქმნის, პროფესიული საქმიანობის გაგრძელებისთვის ბევრი ალტერნატივა გამოუჩნდება, აი, არხის იმიჯი კი საბოლოოდ შეილახება.
სოლიდარობა “რეალურ სივრცეს”, რომელიც, ჩემი აზრით, საუკეთესო პროექტია არამხოლოდ “პირველ არხზე”, არამედ მთლიანად ქართულ სატელევიზიო სივრცეში,”-წერს გურამ როგავა.
შეგახსენებთ, რომ გავრცელებული ინფორმაციით, საზოგადოებრივ მაუწყებელში რეორგანიზაცია იგეგმება. მათ შორის დაიხურება გადაცემები და გათავისუფლდებიან თანამშრომლები.
ერთ-ერთი გადაცემა რომელის დახურვაზეც ინფორმაცია გავრცელდა “რეალური სივრცეა”, რომლის ავტორი და წამყვანი ჟურნალისტი ნინო ზაუტაშვილია.