ოზურგეთის მუნიციპალიტეტის სოფელ მერიაში ძაღლმა ორი მცირეწლოვანი დაკბინა. 5 წლისა და 2 წლისა და 7 თვის ბავშვებს, რომლებიც ძმები არიან, თავს მიუსაფარი ძაღლი დაესხა. განსაკუთრებით მძიმეა უმცროსი ბიჭის მდგომარეობა. მას დაზიანებები თავის ქალაზე აქვს მიყენებული. ბავშვი თბილისში, იაშვილის კლინიკაშია გადაყვანილი და ამ წუთებში ოპერაცია უტარდება.
თვითმხილველები ამბობენ, რომ ბავშვთან ერთად, დედა იმყოფებოდა, როცა მათ ძაღლი დაესხა თავს. დედასა და შვილებს მეზობელი მიეშველა, იმ დროს კი, როცა მცირეწლოვანს ავტომობილში სვამდნენ, რათა კლინიკაში გადაეყვანათ, ძაღლი იქვე, დედა-შვილის საცხოვრებელ სახლთან, მეორე ბავშვს დაესხა თავს და უმძიმესი დაზიანებები მიაყენა. მეზობლების ინფორმაციით, დედამ მეორე შვილი უგონო მდგომარეობაში იპოვა.
ამ დროის მონაცემებით, უფროსი ბიჭის სიცოცხლეს საფრთხე არ ემუქრება. მას სიცოცხლისთვის შეუთავსებელი დაზიანებები არ აქვს.