იმის ფონზე, რომ უკრაინისათვის აშშ-ისა და ევროპის დახმარება ახლა სერიოზული საფრთხის ქვეშ არის, ბაიდენის ადმინისტრაციასა და ევროპელ ოფიციალურ პირებს ჩუმად გადააქვთ ფოკუსი რუსეთზე ტოტალური გამარჯვების უკრაინის მიზნის მხარდაჭერიდან ომის დასრულების თაობაზე შესაძლო მოლაპარაკებებისთვის უკრაინის პოზიციების გაუმჯობესებაზე. ინფორმაციას ამის შესახებ ამერიკული გამოცემა POLITICO ბაიდენის ადმინისტრაციის ოფიციალურ პირებსა და ევროპელ დიპლომატებზე დაყრდნობით ავრცელებს.
გამოცემა აღნიშნავს, რომ ასეთი მოლაპარაკება, სავარაუდოდ, ნიშნავს უკრაინის ტერიტორიის ნაწილის რუსეთისთვის დათმობას.
თეთრი სახლი და პენტაგონი საჯაროდ აცხადებენ, რომ აშშ-ის ადმინისტრაციის პოლიტიკა არ შეცვლილა, რომ ისინი კვლავ უჭერენ მხარს უკრაინის მიზანს, რუსი სამხედროები ქვეყნიდან სრულად განდევნონ, მაგრამ თავად უკრაინელებთან ერთად, ამერიკელი და ევროპელი ოფიციალური პირები ახლა განიხილავენ უკრაინული ძალების გადაჯგუფებას ძირითადად წარუმატებელი კონტრშეტევიდან რუსული ძალების წინააღმდეგ უფრო ძლიერ თავდაცვით პოზიციაზე.
ბაიდენის ადმინისტრაციის ოფიციალურმა პირმა POLITICO-ს განუცხადა, რომ ამ სტრატეგიული ცვლილების დიდი ნაწილი მიმართულია უკრაინის პოზიციის გამყარებაზე ნებისმიერ მომავალ მოლაპარაკებებში.
“ეს იყო ჩვენი თეორია მთელი ამ პერიოდის განმავლობაში: ერთადერთი გზა, რომლითაც ეს ომი საბოლოოდ დასრულდება, არის მოლაპარაკება. ჩვენ გვსურს, რომ უკრაინა ძლიერ პოზიციაში იყოს, როდესაც ეს მოხდება”, – განაცხადა ბაიდენის ადმინისტრაციის ოფიციალურმა პირმა.
მისი თქმით, მოლაპარაკებები ჯერ არ იგეგმება და უკრაინული ძალები ადგილზე კვლავ შეტევაში არიან.
აშშ-ის კონგრესის ოფიციალურმა პირმა POLITICO-ს განუცხადა, რომ დისკუსიები სამშვიდობო მოლაპარაკებების შესახებ იწყება, მაგრამ ადმინისტრაცია საჯაროდ ვერ იხევს უკან ბაიდენისთვის პოლიტიკური რისკის გამო.
გასული წლის განმავლობაში ბაიდენმა შეცვალა ფორმულირებები: ის ჯერ ამბობდა, რომ აშშ მხარს დაუჭერს უკრაინას “იმდენ ხანს, რამდენიც საჭირო იქნება”, შემდეგ თქვა, რომ აშშ მხარს დაუჭერს უკრაინას “მანამ, სანამ ჩვენ შეგვიძლია” და დასძინა, რომ უკრაინამ “უკვე უზარმაზარი გამარჯვება მოიპოვა, ხოლო პუტინმა მარცხი განიცადა”.
ზოგიერთი ანალიტიკოსი მიიჩნევს, რომ ეს არის ფარული მესიჯი: მოემზადეთ ნაწილობრივი გამარჯვების გამოსაცხადებლად და იპოვეთ გზა მოსკოვთან, სულ მცირე, ზავის ან ცეცხლის შეწყვეტის დასადებად.
გამოცემა აღნიშნავს, რომ თავდაცვაზე გადასვლამ შესაძლოა უკრაინას დრო მისცეს, რათა საბოლოოდ აიძულოს პუტინი მისაღებ კომპრომისზე წავიდეს.
ბაიდენს პოლიტიკური საფრთხე ემუქრება, თუ ომი უკრაინელებისთვის ცუდად წავა, თუ პუტინი მომავალ წელს დაიწყებს ბრძოლის ველზე უპირატესობის აღდგენას, მას შემდეგ, რაც ბაიდენმა უკვე ჩადო დაახლოებით 100 მილიარდი დოლარი რუსეთის შესაჩერებლად.