„ხალხის ძალის” დღევანდელი წერილი საკმარისად მოიცავს თავისი პოზიციის განმარტებით არგუმენტებს, რომელთა მსხვრევა ყველაზე ურჩ სკეპტიკოსსაც კი გაუჭირდება, – ასე ეხმიანება „ხალხის ძალის“ წევრი დავით ქართველიშვილი, „ხალხის ძალის“ განცხადებას, სადაც ნათქვამია, რომ წლების მანძილზე, მთავარ სტრატეგიულ პარტნიორს ვუწოდებდით სახელმწიფოს, რომლის ე.წ. დახმარების 90% იმ ენჯეოებზე და ფიქციური ენჯეოების გავლით, პარტიებზე მოდის, რომლებიც საქართველოში ე.წ. პოლარიზაციის გაღვივების, სახელმწიფო ინსტიტუტების მოშლის, აგენტოკრატიის აღდგენისა და ფსევდოლიბერალური იდეოლოგიის გავრცელების მცდელობით არიან დაკავებული.
ქართველიშვილის თქმით, დღეს საქართველომ უნდა განდევნოს ილუზია, სიცრუე, თავის მოტყუება – შეჯერდეს მხოლოდ სიმართლეზე და მხოლოდ სიმართლის პლატფორმა შესთავაზოს აშშ-ს საქართველოსთან ნორმალური ურთიერთობების შენარჩუნების მიზნით.
„ხალხის ძალის“ დღევანდელი წერილი საკმარისად მოიცავს თავისი პოზიციის განმარტებით არგუმენტებს, რომელთა მსხვრევა ყველაზე ურჩ სკეპტიკოსსაც კი გაუჭირდება. მე მხოლოდ რამდენიმეს დავამატებდი. წლებია აშშ-ის წარმომადგენელთა პალატაში საქართველოს მეგობართა ჯგუფი ფუნქციონირებს. აი ის, რომლის თანათავმჯდომარე ადამ კიზინგერი იყო.
საქართველოს მეგობართა – არა ნაცსექტის, არა „ენჯეოთა“ თუ ელგებეტე თემის – საქართველოს! ერთი მაგალითი თუ ახსენდება საქართველოს, თუ რაში გამოიხატებოდა ეს „მეგობრობა“. მავნებლობის, დამცირების, აგდებული დამოკიდებულების გარდა მე პირადად არაფერი მახსენდება. ვერც კიზინგერის “რესპუბლიკელობამ” უშველა ამ ცინიკური სახელწოდების მქონე ჯგუფს ჩვენს ქვეყანასთან “სამეგობრო მუხტის” აწევაში – ალბათ იმ გამონათქვამიდან გამომდინარე, რომ „ყველა დროის რესპუბლიკელებს აუცილებლად ერთი მაკკეინი უნდა ჰყავდეს”.
პირიქით, ეს ის ჯგუფი იყო, სადაც იხარშებოდა საქართველოს დასანქცირების, ბიძინა ივანიშვილის “ოლიგარქობის” თუ ჩვენი მოსამართლეების დასჯის საკითხები. ეს ჯგუფი საქართველოს კი არა, მაკკეინის ინსტიტუტის მეგობარი იყო, რომლის შეკრებებზე თბილისში ვიღაც დევიდ კრამერს შეეძლო დარბაზიდან საქართველოს პარლამენტის ვიცე-სპიკერის გაძევება მოეთხოვა. დღეს ჩვენ უნდა განვდევნოთ ჩვენგან ილუზია, სიცრუე, თავის მოტყუება – შევჯერდეთ მხოლოდ სიმართლეზე და მხოლოდ სიმართლის პლატფორმა შევთავაზოთ აშშ-ს საქართველოსთან ნორმალური ურთიერთობების შენარჩუნების მიზნით“, – წერს დავით ქართველიშვილი Facebook-ზე.