ავსტრალიაში პარლამენტის ყოფილი დეპუტატი უცხო ქვეყნის ჯაშუში გახდა. ამის შესახებ ავსტრალიის უსაფრთხოებისა და დაზვერვის სამსახურის გენერალურმა დირექტორმა მაიკ ბერჯესმა განაცხადა.
ყოფილი დეპუტატის სახელი და ქვეყანა, რომლის ჯაშუშურ ქსელსაც ის შეუერთდა, არ სახელდება. თუმცა ბერჯესი ამბობს, რომ ამ ქვეყნის „აგრესიული და გამოცდილი“ საგარეო დაზვერვისთვის ავსტრალია „პრიორიტეტულ სამიზნეს“ წარმოადგენს.
მაიკ ბერჯესის თქმით, დეპუტატმა უცხო ქვეყნის დაზვერვას ავსტრალიის მაშინდელი პრემიერ-მინისტრის ოჯახთან შუამავლობაც შესთავაზა. ავსტრალიური დაზვერვის ინფორმაციით, ექსდეპუტატის ქმედებები რამდენიმე წლის წინ გამოააშკარავდა.
„ჯაშუშები თავს ასაღებენ კონსულტანტებად, აკადემიკოსებად, მკვლევრებად, მაგრამ ყოფილი დეპუტატი იყო ყველაზე მნიშვნელოვანი ფიგურა, რომელიც წარმატებით გადაიბირა უცხოურმა დაზვერვამ. ამ ადამიანმა უცხოური რეჟიმის ინტერესების სასარგებლოდ საკუთარი ქვეყანა, პარტია და ყოფილი კოლეგები გაყიდა“, – აღნიშნა მაიკ ბერჯესმა.