საკონსტიტუციო ცვლილებებს ოპოზიციის ნაწილის მხარდაჭერა არ ექნება, თუმცა განხილვებში სავარაუდოდ, ჩაერთვებიან. კონსტიტუციური კანონპროექტის მოწინააღმდეგეები აცხადებენ, რომ ლგბტ პროპაგანდისგან მომდინარე საფრთხე ხელოვნურად გამოგონილია.
„წინასაარჩევნოდ თემის გამოგონება უნდოდათ, მაგრამ კოვზი ნაცარში ჩაუვარდათ. ამიტომ გადავიდნენ საკონსტიტუციო ცვლილებაზე, იციან რომ ამ ცვლილებას არავინ დაუჭერს მხარს. საკონსტიტუციო განხილვები როცა იქნება, ჩავერთვებით და კიდევ ერთხელ ვამხელთ“, – განაცხადა საპარლამენტო პოლიტიკური ჯგუფის „ევროოპტიმისტების” თავმჯდომარემ, რომან გოცირიძემ.
„სტრატეგია აღმაშენებლის“ გენერალური მდივანი, პაატა მანჯგალაძე ამბობს, რომ ხელისუფლების მიზანი რეალურად ხალხის ემოციებით მანიპულირებაა.
„ქრისტიანულ ქვეყანას, რომელსაც ამის 2000-წლიანი გამოცდილება აქვს, არანაირი გარყვნილება არ ემუქრება“, – აღნიშნავს მანჯგალაძე.
ოჯახურ ღირებულებათა და არასრულწლოვანთა უფლებების დაცვის მოტივით „ქართულმა ოცნებამ“ კონსტიტუციური კანონპროექტი მოამზადა, რომელიც პარლამენტს წარედგინება. საუბარია რვა პუნქტზე. ცვლილებები კონსტიტუციის 30-ე მუხლს ეხება, რომელიც ქორწინებას, დედათა და ბავშვთა უფლებებს განსაზღვრავს