ადამიანი ვერ გაარკვევს, რომელი დონორისგან რა რაოდენობის თანხები ირიცხება არასამთავრობო ორგანიზაციების ანგარიშებზე და შემდეგ რა მიმართულებით მიედინება ეს უზარმაზარი საშუალებები, – ამის შესახებ ფრაქცია „ქართული ოცნების“ თავმჯდომარის პირველმა მოადგილემ გია ცაგარეიშვილმა „ქრონიკასთან“ განაცხადა.
„ორგანიზაციები, რომლებიც სხვის გამჭვირვალეობაზე ასე წუხან, დარდობენ, შფოთავენ, თვითონ არიან აბსოლუტურად დახურულები გარეშე თვალისგან. თავიდან ბოლომდე გასაიდუმლოებულია მათი ხარჯები. ადამიანი ვერ გაარკვევს, რომელი დონორისგან რა რაოდენობის თანხები ირიცხება არასამთავრობო ორგანიზაციების ანგარიშებზე და შემდეგ რა მიმართულებით მიედინება ეს უზარმაზარი საშუალებები. უზარმაზარი თანხების დაფარული ხარჯვა საქართველოში დემოკრატიის განვითარებას ნამდვილად ვერ შეუწყობს ხელს. ეს არის კლასიკური ფარისევლობა“, – აღნიშნა ცაგარეიშვილმა.
ოპოზიცია მესამე სექტორის ფინანსური გამჭვირვალობის აუცილებლობას ვერ ხედავს და ამ თემის გააქტიურებას პოლიტიკური მოტივით ხსნის. „ქართული ოცნება“ კი აცხადებს, რომ საზოგადოებამ უნდა იცოდეს, რა მიზნით იხარჯება დონორებისგან გადმორიცხული თანხა, რადგან მათი საქმიანობის შესახებ ლეგიტიმური კითხვები ჩნდება. კერძოდ, ხვდება თუ არა მესამე სექტორის გავლით უცხოური ფული ქართულ პოლიტიკაში. ამასთან, იხსენებენ მარტში განვითარებულ მოვლენებს და ამბობენ, რომ სწორედ ფინანსური გაუმჭვირვალობისთვის აპროტესტებდა ოპოზიცია და მესამე სექტორის ნაწილი უცხოური გავლენის გამჭვირვალობის შესახებ მომზადებულ კანონპროექტს.