საქართველოს ევროპასთან ინტეგრაციის კომიტეტის დელეგაციამ მაკა ბოჭორიშვილის ხელმძღვანელობით, ბრიუსელში გამართულ ევროკავშირის ეროვნული პარლამენტების ევროპულ საქმეთა კომიტეტების კონფერენციის (COSAC) პლენარულ სესიაში მიიღო მონაწილეობა.
სხდომაზე, რომელიც ბელგიის ევროკავშირის თავმჯდომარეობის ფარგლებში ჩატარდა, განიხილეს ევროკავშირისთვის აქტუალური თემები, სტრატეგიული დღის წესრიგი, ევროკავშირის უსაფრთხოებისა და თავდაცვისუნარიანობის გაზრდასთან დაკავშირებული საკითხები, ევროპაში დემოკრატიისა და კანონის უზენაესობის მნიშვნელობა.
მაკა ბოჭორიშვილმა სიტყვით გამოსვლისას ყურადღება გაამახვილა ევროკავშირის გაფართოების პოლიტიკის მნიშვნელობაზე, საქართველოს მიერ მიღწეულ პროგრესზე ევროინტეგრაციის პროცესში და ხაზი გაუსვა კანდიდატ ქვეყნებთან მოლაპარაკებების დაუყოვნებლივ გახსნის აუცილებლობას.
ევროკავშირის ეროვნული პარლამენტების ევროპულ საქმეთა კომიტეტების კონფერენციის (COSAC) პლენარულ სესიაზე მიიღეს დასკვნითი დოკუმენტი, რომელშიც ეროვნული პარლამენტების წევრები რეკომენდაციას უწევენ საქართველოსთან გაწევრიანების მოლაპარაკებების გახსნისთვის მუშაობის დაწყებას, დამსახურებაზე დაფუძნებული მიდგომის შესაბამისად; კიდევ ერთხელ გამოხატავენ ურყევ მხარდაჭერას საქართველოს დამოუკიდებლობის, სუვერენიტეტისა და ტერიტორიული მთლიანობა მიმართ.