ვენეციის კომისიის არცერთ რეკომენდაციას არ გავიზიარებთ, რომელიც ევროპის არცერთ ქვეყანაში არ იქნება პრეცედენტის სახით, – ამის შესახებ პარტია „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ განაცხადა.
მისი თქმით, ევროკავშირის ელჩი მართალს ამბობს, რომ რეკომენდაციების უდიდესი ნაწილი გაზიარებულია.
„გაზიარებული არ არის ის ნაწილი, სადაც პარტიულ წარმომადგენელს ცესკო-ს თავმჯდომარე უნდა შეეცვალა მისი თანამდებობიდან გადაყენების შემთხვევაში, რაც ხაზარაძის პარტიის ამოცანა და გეგმა იყო. ჩვენ ეს ბევრი არგუმენტით არ გავიზიარეთ, მათ შორის იმით, რომ ეს არ არის სწორი სამართლებრივ პრინციპზე დაყრდნობით. ასევე, იმ არგუმენტზე დაყრდნობით, რომ ევროპის არცერთ ქვეყანაში მიმსგავსებული პრეცედენტიც კი არ არის. იმ ნაწილზე, რომელიც გაზიარებული არ არის, ჩვენი ახსნა გვაქვს და თან ძალიან ობიექტური. ვენეციის კომისიის რეკომენდაცია თუ იქნება ისეთი, რა პრეცედენტიც ევროპის არცერთ ქვეყანაში არ არის და მიმსგავსებული ვერსიაც კი არ არსებობს ცივილიზებულ სამყაროში, ამიერიდან თუ მოგვცემენ, არც იმას გავითვალისწინებთ, წინასწარ ვამბობ. თუ ისეთ რეკომენდაციას გასცემენ, არა მხოლოდ წარსულში რაც არ გავიზიარეთ, რა თქმა უნდა, რომელიც ევროპის არცერთ ქვეყანაში არ იქნება, ანალოგი არსად იქნება, აცდენილი იქნება ევროპულ პრაქტიკას აბსოლუტურად და მსგავსი პრეცედენტი არ იქნება, ახლა ხომ არ გავიზიარებთ და ვხსნით რატომაც არ გავიზიარებთ, მომავალშიც არ გავიზიარებთ“, – აღნიშნა მდინარაძემ.