დამატებით დროში ცოტა ვინერვიულეთ, მაგრამ პენალტებში ალბათ მამარდაშვილმა იყოჩაღა და ასე რომ ვთქვათ, საქართველოს ნაკრები გაიყვანა ევროპის ჩემპიონატზე. დიდი დამსახურებაა მეკარის. გულშემატკივრები ისე გულშემატკივრობდნენ, ამან ცოტა დააბნია კიდეც საბერძნეთის ნაკრები, – ამის შესახებ ვეტერანმა ფეხბურთელმა გიორგი დემეტრაძემ „დღის ქრონიკაში“ განაცხადა.
„პირველად მოვხვდით ევროპის ჩემპიონატზე და ალბათ ასეთი მუხტი და ასეთი განწყობა რაც უფროსი თაობიდან ვიცი, 1981 წლის შემდეგ არ ყოფილა. დიდი როლი ითამაშა გულშემატკივარმა, სტადიონზე ასეთი გულშემატკივრობა არ ყოფილა. საქართველოს ნაკრებმა დაამტკიცა, რომ ყველა მეტოქესთან იბრძოლოს და გაიმარჯვოს. მე არ მახსოვს, რომ დამატებითი დრო და პენალტები ყოფილიყო ოდესმე. ძალიან მძიმე გუნდი იყო საბერძნეთის ნაკრები და ძალიან მძიმე თამაში იყო. ჩვენ ვეთამაშებოდით ევროპის ჩემპიონებს, საბერძნეთის ნაკრებს. საქართველოს ნაკრების თითოეულმა ფეხბურთელმა მაქსიმუმი გააკეთა, რომ ეს თამაში მოგვეგო. დამატებით დროში ცოტა ვინერვიულეთ, მაგრამ პენალტებში ალბათ მამარდაშვილმა იყოჩაღა და ასე რომ ვთქვათ, საქართველოს ნაკრები გაიყვანა ევროპის ჩემპიონატზე. დიდი დამსახურებაა მეკარის. გულშემატკივრები ისე გულშემატკივრობდნენ, ამან ცოტა დააბნია კიდეც საბერძნეთის ნაკრები. პენალტები არის ლატარია და აქ ვერ განსაზღვრავ, ვინ გაიტანს და ვინ არა [გოლს]. მაგრამ მაინც ფსიქოლოგიური განწყობა პირველ რიგში მთავარია“, – აღნიშნა დემეტრაძემ.
რაც შეეხება მოლოდინებს, ყოფილი ფეხბურთელი დარწმუნებულია, რომ საქართველოს შემდეგ მეტოქეებად საბერძნეთზე ძლიერი გუნდი არ ეყოლება.
„დარწმუნებული ვარ, რომ თურქეთის და ჩეხეთის ნაკრები საბერძნეთზე ძლიერი არ არის და მჯერა, რომ საქართველოს ნაკრები ჯგუფიდან გავა“, – აღნიშნა დემეტრაძემ