მოლდოვის საკონსტიტუციო სასამართლომ გადაწყვეტილება მიიღო, რომ პრორუსული პოლიტიკური პარტიის კანდიდატებს, რომელსაც ხელმძღვანელობს ქვეყნიდან გაქცეული მილიარდერი, შეუძლიათ მონაწილეობა მიიღონ საპრეზიდენტო არჩევნებში, რომელიც მიმდინარე წლის ბოლოს გაიმართება. ინფორმაციას ამის შესახებ ამერიკული გამოცემა POLITICO ავრცელებს.
პარტია „შორი“, რომელსაც ხელმძღვანელობს ილან შორი, მოლდოველი ბიზნესმენი, რომელიც ამჟამად ისრაელში ცხოვრობს, გასული წლის ივნისში დაიშალა მას შემდეგ, რაც სასამართლომ დაადგინა, რომ იგი მოქალაქეებს ფულს უხდიდა არეულობის ორგანიზებისთვის.
ოქტომბერში მოლდოვის პარლამენტმა შეცვალა საარჩევნო კოდექსი და არალეგალურად ან არაკონსტიტუციურად მიჩნეულ პარტიებთან ასოცირებულ პირებს სამი წლით აეკრძალათ არჩევნებში მონაწილეობა.
თუმცა, მოლდოვის საკონსტიტუციო სასამართლომ სამშაბათს დაადგინა, რომ ოქტომბრის ცვლილებები საარჩევნო კოდექსში არაკონსტიტუციური იყო.
ილან შორი მიესალმა საკონსტიტუციო სასამართლოს გადაწყვეტილებას და განაცხადა, რომ ეს გადაწყვეტილება არა მხოლოდ აღადგენს ცალკეულ პირთა უფლებებს, არამედ კითხვის ნიშნის ქვეშ აყენებს გასული არჩევნების ლეგიტიმაციას.
მოლდოვის პარლამენტის სპიკერმა, იგორ გროსუმ განაცხადა, რომ მთავრობა პატივს სცემს საკონსტიტუციო სასამართლოს 26 მარტის გადაწყვეტილებას, მაგრამ ყველა ღონეს გამოიყენებს იმისათვის, რომ კრიმინალურ ორგანიზაციებთან დაკავშირებულ ნებისმიერ პირს არ შეეძლოს საჯარო თანამდებობაზე კენჭისყრა.