ბელგიის პრემიერ-მინისტრმა, ალექსანდერ დე კროომ განაცხადა, რომ ევროპარლამენტის დეპუტატებს რუსული პროპაგანდის გავრცელებისთვის ფული გადაუხადეს. ინფორმაციას ამის შესახებ გამოცემა POLITICO ავრცელებს.
ბელგიის მთავრობის მეთაურის თქმით, მიმდინარე კვირაში მჭიდრო თანამშრომლობას ჰქონდა ადგილი ბელგიისა და ჩეხეთის სადაზვერვო სამსახურებს შორის რუსული პროპაგანდისტული ქსელის აღკვეთის მიზნით.
„მაგალითად, გაირკვა, რომ რუსეთმა მიმართა ევროპარლამენტარებს და გადაუხადა [მათ] რუსული პროპაგანდის გასაძლიერებლად აქ“, – აღნიშნა დე კროომ ბელგიის პარლამენტში უცხოური ჩარევის შესახებ დებატების დროს, თუმცა კონკრეტული ევროპარლამენტარების ვინაობა არ დაუსახელებია.
დე კროოს სპიკერმა POLITICO-ს განუცხადა, რომ პრემიერ-მინისტრი საუბრობდა ჩეხეთის მთავრობის გადაწყვეტილებაზე, რომლითაც სანქციები დაუწესდა საინფორმაციო საიტ Voice of Europe-ს, რომელსაც პრაღამ პრორუსული გავლენის ოპერაციის ნაწილი უწოდა.
ჩეხეთის საგარეო საქმეთა სამინისტრომ ოთხშაბათს გამოაცხადა, რომ სანქციები დაუწესა უკრაინელ ოლიგარქ ვიქტორ მედვედჩუკს. ჩეხეთის საგარეო უწყებაში აღნიშნეს, რომ მედვედჩუკმა განახორციელა „რუსული გავლენის ოპერაცია“ რუსეთიდან ჩეხეთის ტერიტორიაზე Voice of Europe-ის გამოყენებით.
ევროპარლამენტის პრესსპიკერის მოადგილემ, დელფინ კოლარმა განაცხადა, რომ ევროპარლამენტი ამჟამად იკვლევს ჩეხეთის ხელისუფლების დასკვნებს Voice of Europe-ის შესახებ.