ამერიკულ გაზეთ The Washington Post-თან ინტერვიუში უკრაინის პრეზიდენტმა, ვოლოდიმირ ზელენსკიმ აშშ-ის კონგრესს მოუწოდა, რაც შეიძლება მალე დაამტკიცოს დამატებითი დაფინანსება უკრაინისათვის.
„მოგვეცით იარაღი რუსეთის თავდასხმების შესაჩერებლად. წინააღმდეგ შემთხვევაში, უკრაინა გააძლიერებს კონტრშეტევებს რუსეთის აეროდრომებზე, ენერგეტიკულ ობიექტებსა და სხვა სტრატეგიულ ობიექტებზე“, – აღნიშნა ვოლოდიმირ ზელენსკიმ.
უკრაინის ლიდერმა აღნიშნა, რომ აშშ-ის მხარდაჭერის გარეშე, უკრაინას არ ექნება საჰაერო თავდაცვა, Patriot-ის რაკეტები, 155-მილიმეტრიანი საარტილერიო ჭურვები და ეს ნიშნავს, რომ „ჩვენ უკან დავიხევთ, ნაბიჯ-ნაბიჯ, პატარა ნაბიჯებით“.
კითხვაზე, ფიქრობს თუ არა, რომ პრეზიდენტი ბაიდენი ზედმეტად ფრთხილია იარაღის მიწოდებასთან დაკავშირებით, ზელენსკიმ უპასუხა:
ვფიქრობ, ის ფრთხილობს რუსეთის მხრიდან [შესაძლო] ბირთვული თავდასხმის გამო. პუტინი გიჟია. მსოფლიოში არავინაა, ვინც 100 პროცენტით გეტყვით, რას გააკეთებს ის. ამიტომ ბაიდენი ფრთხილობს.
„ნახევარი წელი დავკარგეთ. ჩვენ აღარ შეგვიძლია დროის დაკარგვა. უკრაინა არ შეიძლება იყოს პოლიტიკური საკითხი [აშშ-ის] პოლიტიკურ პარტიებს შორის“, – დასძინა მან.