თქვენმა საქმიანობამ დაადასტურა, რომ პარტიის ქალთა ორგანიზაციის შექმნა იყო ნამდვილად სწორი და წარმატებული პროექტი, – ამის შესახებ მაკა ბოჭორიშვილმა „ქართული ოცნების“ ქალთა ორგანიზაციის კონფერენციაზე გამოსვლისას განაცხადა.
პარლამენტის ევროინტეგრაციის კომიტეტის თავმჯდომარემ პარტიის ქალთა ორგანიზაციის წევრებს მიმართა და მადლობა გადაუხადა, რომ ბოლო ორი წლის განმავლობაში შესრულებული სამუშაოს შედეგად „ქართული ოცნება“ გააძლიერეს.
„თქვენმა საქმიანობამ დაადასტურა, რომ პარტიის ქალთა ორგანიზაციის შექმნა იყო ნამდვილად სწორი და წარმატებული პროექტი. გასული ორი წლის საქმიანობის შედეგების შეფასების გათვალისწინებით, პატივი მაქვს წარმოგიდგინოთ, პარტიის პოლიტიკური საბჭოს წინადადებები, პარტიის ქალთა ორგანიზაციის გამგეობის წევრებისა და თავმჯდომარის კანდიდატებთან დაკავშირებით. გთხოვთ, თქვენს მხარდაჭერას, რათა ამ ორი წლის განმავლობაში შექმნილი მიღწევები მომავალი ორი წლის განმავლობაშიც ასევე წარმატებით გავაგრძელოთ“, – განაცხადა ბოჭორიშვილმა.
მან ყრილობის წევრებს პარტიის ქალთა ორგანიზაციის გამგეობის წევრებისა და თავმჯდომარის კანდიდატები წარუდგინა.