უკრაინის პრეზიდენტმა ვოლოდიმირ ზელენსკიმ თანამდებობიდან გაათავისუფლა თავისი პირველი თანაშემწე სერგეი შეფირი. შესაბამისი ბრძანება უკრაინის პრეზიდენტის ვებგვერდზე გამოქვეყნდა.
შეფირი პრეზიდენტის პირველი თანაშემწის თანამდებობას 2019 წლიდან იკავებდა. ის ზელენსკისთან ერთად „მხიარულთა და საზრიანთა კლუბში“ თამაშობდა, შემდეგ კი სტუდია „კვარტალ 95“-ში მუშაობდა. სერგეი შეფირს ზელენსკისთან ერთ-ერთ ყველაზე დაახლოებულ პირად მიიჩნევენ.
ამასთანავე, ზელენსკიმ თანამდებობებიდან გაათავისუფლა სამი შტატგარეშე მრჩეველი – მიხაილ რადუცკი, სერგეი ტროფიმოვი და ოლეგ უსტენკო. თანამდებობები ასევე დატოვეს სამხედროების უფლებების უზრუნველყოფის საკითხებში პრეზიდენტის რწმუნებულმა ალიონა ვერბიცკაიამ და მოხალისეობრივი საქმიანობის საკითხებში რწმუნებულმა ნატალია პუშკარევამ.
რას უკავშირდება ეს საკადრო გადაწყვეტილებები, უცნობია.