თბილისის საქალაქო სასამართლოში ამ წუთებში სასწრაფო დახმარების სამსახურის ყოფილი სამი მენეჯერისთვის აღკვეთის ღონისძიების შეფარდებაზე სხდომა მიმდინარეობს.
ბრალდების მხარე აღნიშნული პირებისთვის პატიმრობას ითხოვს.
დაკავებულებს ბრალად ედებათ დიდი ოდენობით ქრთამის აღება. საქმეზე ბრალი წარედგინა კიდევ ორ პირს, რომელთა სასამართლო სხდომა უახლოეს დღეებში გაიმართება. მიმდინარეობს გამოძიება.
სახელმწიფო უსაფრთხოების სამსახურის თანამშრომლებმა, მოსამართლის განჩინების საფუძველზე, წინასწარი შეთანხმებით ჯგუფის მიერ განსაკუთრებით დიდი ოდენობით ქრთამის აღების ფაქტზე, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სსიპ საგანგებო სიტუაციების კოორდინაციისა და გადაუდებელი დახმარების ცენტრის ჰოსპიტალიზაციის ცვლის უფროსის ყოფილი მოადგილე და ამავე ცენტრის ჰოსპიტალიზაციის ორი ყოფილი მენეჯერი დააკავეს, ხოლო უკანონო ქმედების ჩასადენად ქრთამის მიცემისათვის ორ პირს ბრალდება წარუდგინეს.