თურქეთში დღეს მუნიციპალური არჩევნები იმართება.
მთელი ქვეყნის მასშტაბით 200 ათასი საარჩევნო უბანია გახსნილი. 61 მილიონზე მეტი რეგისტრირებული ამომრჩეველი ქალაქის მერებს, რეგიონულ და რაიონულ მმართველებს ხუთი წლის ვადით აირჩევს.
არჩევნებში 34 პოლიტიკური პარტია მონაწილეობს.
როგორც თურქული მედია წერს, მთავარი ბრძოლა სტამბოლისთვის გაიმართება, რომლის მერი ამჟამად ოპოზიციური „სახალხო რესპუბლიკური პარტიის“ ლიდერი, პრეზიდენტ რეჯეფ თაიფ ერდოღანის მთავარი მეტოქე ექრემ იმამოღლუა. სტამბოლის მერობისთვის პრეზიდენტ ერდოღანის მმართველი „სამართლიანობისა და განვითარების პარტიიდან“ გარემოს დაცვის ყოფილი მინისტრი მურათ ქურუმი იბრძვის.
ოპოზიციური „სახალხო რესპუბლიკური პარტია“ ამ მუნიციპალურ არჩევნებზე ეცდება, შეინარჩუნოს კონტროლი მსხვილ ქალაქებზე, მათ შორის, სტამბოლზე, ანკარასა და ანტალიაზე, სადაც ოპოზიციამ გამარჯვების მოპოვება 2019 წლის არჩევნებში შეძლო.
აღსანიშნავია, რომ საპრეზიდენტო არჩევნებში დამარცხების შემდეგ დაიშალა ოპოზიციური ალიანსი, რომელმაც 2019 წელს დიდწილად უზრუნველყო სტამბოლში იმამოღლუს გამარჯვება. ამჯერად ოპოზიციურ პარტიებს მუნიციპალურ არჩევნებში საკუთარი კანდიდატები ჰყავთ წარდგენილი, მათ შორის, პროქურთულ „სახალხო დემოკრატიულ პარტიას“, რომელსაც სტამბოლში საკმაოდ დიდი ელექტორატი ჰყავს.
არჩევნების დღეს თურქეთში აკრძალულია ყველა სახის ალკოჰოლის გაყიდვა და მოხმარება. ხმის მიცემის პროცედურის მიმდინარეობისას დახურულია გასართობი დაწესებულებები.