რუს პილოტს მაქსიმ კუზმინოვს ექვსი ტყვია აქვს ნასროლი – წერს New York Times რუსი პილოტის მკვლელობასთან დაკავშირებულ სტატიაში.
მაქსიმ კუზმინოვი 2023 წელს უკრაინულ მხარეს MI-8 ტიპის ვერტმფრენით ჩაბარდა, 2024 წლის 19 თებერვალს კი ის ესპანეთში, მოკლული იპოვეს.
The New York Times ესპანეთის პოლიციიდან წყაროებზე დაყრდნობით წერს, რომ კუზმინოვის მკვლელობის ადგილზე აღმოაჩინეს მაკაროვის სისტემის პისტოლეტის ჭურვები. იარაღი, რომლითაც მას ესროლეს, აქამდე არ იყო ცნობილი.
კუზმინოვზე თავდასხმა მისივე საცხოვრებელი სახლის მიწისქვეშა ავტოსადგომზე მოხდა. საქმეში ორი პირი ფიგურირებს, რომლებამც სავარაუდოდ, სამიზნეს ჯერ დაუძახეს, შემდეგ კი ცეცხლი გაუხსნეს. ექვსი ჭრილობის მიუხედავად, პილოტმა გარკვეული მანძილი გაიარა, შემდეგ კი დაეცა, ხოლო უკვე ცხედარს, მანქანითაც გადაუარეს.
არსებული ინფორმაციით, თავდამსხმელები სათვალთვალო კამერამ დააფიქსირა, თუმცა იმის გამო, რომ ნიღბები ეკეთათ, მათი იდენტიფიცირება არ მომხდარა. მანქანა კი, რომლითაც ისინი დანაშაულის ადგილზე მივიდნენ მოპარული იყო . მკვლელობის შემდეგ კი ის დაწვეს.
კუზმინოვის ცხედარი 13 თებერვალს ესპანეთის სამხრეთ-აღმოსავლეთ სანაპიროზე, ალიკანტეს პროვინციაში, ქალაქ ვილახოიოოსში, კომუნალური ავტოფარეხის პანდუსზე იპოვეს.
მოკლულს იგორ შევჩენკოს სახელზე უკრაინული პასპორტი უპოვეს, თუმცა ესპანური მედიის ცნობით, ესპანეთის სამოქალაქო გვარდია თავდაპირველად ეჭვობდა, რომ მოკლული ყალბ დოკუმენტებს იყენებდა.
ესპანეთის ხელისუფლებამ ოფიციალურად არ გაამჟღავნა მოკლულის ვინაობა, მაგრამ El País-ის წყაროები ალიკანტეს პოლიციაში ადასტურებდნენ, რომ ეს სწორედ კუზმინოვი იყო. მისი სიკვდილი დაადასტურა უკრაინის მთავარმა სადაზვერვო სამმართველომ და ირიბად რუსეთის ხელისუფლებამაც.
The New York Times-თან ესპანელი პოლიციის ოფიცრები აცხადებენ, რომ კუზმინოვის მკვლელობა ძალიან გავდა 2019 წელს ბერლინში, ზელიმხან ხანგოშვილის მკვლელობას, რომელშიც სწორედ რუსული სპეცსამსახურები მონაწილეობდნენ. პარალელებს ავლებენ რუსეთის სამხედრო დაზვერვის ყოფილი ოფიცრის, სერგეი სკრიპალის მოწამვლის მცდელობასთანაც სოლსბერიში.
ცნობისთვის, მფრინავმა მაქსიმ კუზმინოვმა 2023 წლის აგვისტოში რუსული MI-8 გაიტაცა და უკრაინაში აეროდრომზე დასვა. კუზმინოვი უკრაინის დაზვერვის ვიდეოში ამბობდა, რომ თვითონ დაუკავშირდა უკრაინულ მხარეს, რადგან ომში მონაწილეობა არ სურდა.