“იძებნება სამართალი!” – კვლავ უცნობია ამ შინაარსის სტენსილების ავტორი, რომელიც თბილისში გუშინ გამოჩნდა. მმართველი გუნდი დარწმუნებულია, რომ კამპანიის უკან “ნაციონალური მოძრაობა” და მასთან დაკავშირებული ორგანიზაციები დგანან.
“ქართული ოცნება” ქვეყანაში სასამართლოს დისკრედიტაციის მცდელობასა და მოსამართლეების წინააღმდეგ დაფინანსებულ კამპანიაზე საუბრობს. სტენსილებში პრობლემას ვერ ხედავს ოპოზიცია.
“ხალხის ძალის” წევრი, ეკა სეფიაშვილი ფიქრობს, რომ აღნიშნული კამპანია უცხოეთიდან ფინანსდება, რათა ქვეყანაში სამართლის დისკრედიტაცია მოხდეს.
“როგორც ჩანს, უცხოეთიდან არის ძალიან დიდი ფული გადმორიცხული იმისათვის, რომ მოხდეს ცალკეული მოსამართლეების და ზოგადად ჩვენი მართლმსაჯულების სისტემის დისკრედიტაცია საქართველოს მოსახლეობის თვალში. როგორც ჩანს, ამ დავალებას ასრულებენ ცალკეული პირები – NGO-ები თუ სხვადასხვა მედია საშუალებები. ეს მიმართულია იმ წარმატების გადასაფარად, რასაც საქართველომ მიაღწია”, – განაცხადა ეკა სეფიაშვილმა.