რეგიონული პოლიტიკისა და თვითმმართველობის კომიტეტმა მთავრობის მიერ რატიფიცირებისთვის წარდგენილ „საქართველოსა და ევროპის რეკონსტრუქციისა და განვითარების ბანკს შორის სასესხო შეთანხმებას (თბილისის ნარჩენების გადამუშავების პროექტი)“ მხარი დაუჭირა.
თბილისის მუნიციპალიტეტის მერიამ ფინანსთა სამინისტროს მყარი ნარჩენების სეპარირება-რეციკლირებასთან დაკავშირებით სათანადო ინფრასტრუქტურის მოწყობის მიზნით დაფინანსების მოზიდვის თხოვნით მიმართა. ICP-ENVIROPLAN-კონსორციუმმა, თბილისის მერიის დაკვეთით მოამზადა გრძელვადიანი სტრატეგია, რომლის თანახმადაც, აუცილებელია ნარჩენების სეპარირებული შეგროვების სქემასთან ერთად, ნარჩენების დამუშავების სათანადო ინფრასტრუქტურის მოწყობა, რომელიც მოიცავს დახარისხების ობიექტის და მასალების აღმდგენი ობიექტის მშენებლობას, რაც დადებით გავლენას მოახდენს ნარჩენების შემცირებაზე.
როგორც საქართველოს ფინანსთა მინისტრის პირველმა მოადგილემ გიორგი კაკაურიძემ განაცხადა, ამის დასაფინანსებლად ევროპის რეკონსტრუქციისა და განვითარების ბანკი (EBRD) გამოყოფს სესხს 22 მლნ ევროს ოდენობით. სესხის ხანგრძლივობა 15 წელია.
„გარდა ამისა, პროექტის ფარგლებში, მწვანე კლიმატის ფონდისგან (GGF) გამოიყოფა 4 მლნ ევროს ოდენობით სასესხო რესურსი. სესხის ხანგრძლივობაა 15 წელი“, – აღნიშნა გიორგი კაკაურიძემ.
პროექტს განახორციელებს თბილისის მუნიციპალიტეტი შპს „თბილსერვის ჯგუფის“ მეშვეობით. პროექტის დასრულების სავარაუდო თარიღია 2028 წლის 1 იანვარი.