თურქეთის პრეზიდენტმა, რეჯეფ თაიფ ერდოღანმა სატელეფონო საუბარი გამართა ნიდერლანდების პრემიერ-მინისტრთან, მარკ რუტესთან, რომლის დროსაც მხარეებმა ნატოს ახალი გენერალური მდივნის არჩევის საკითხი განიხილეს.
თურქეთი ერთ-ერთია იმ ქვეყნებს შორის, რომელიც შეიძლება დაბრკოლებად იქცეს მარკ რუტეს ნატოს მოქმედი გენერალური მდივნის, იენს სტოლტენბერგის მემკვიდრედ დამტკიცებისთვის.
სატელეფონო საუბარში ერდოღანმა რუტეს განუცხადა, თუ რა მოლოდინები აქვს თურქეთს ახალი გენერალური მდივნისგან.
კერძოდ, თურქეთის პრეზიდენტმა განაცხადა, რომ ნატოს ახალი გენერალური მდივანი უკეთ უნდა ემსახუროს ალიანსის წევრების უსაფრთხოებასა და ინტერესებს ტერორიზმთან და სხვა გამოწვევებთან ბრძოლაში, გააძლიეროს ალიანსის ერთიანობა და პრიორიტეტი მიანიჭოს ნატოს მთავარ როლს, ერთგული იყოს ძირითადი ღირებულებებისა და ალიანსის დამკვიდრებული პრაქტიკის მიმართ და გაითვალისწინოს იმ მოკავშირეების სენსიტიური მომენტები, რომლებიც არ არიან ევროკავშირის წევრები.