მოსკოვის ბასმანის რაიონულმა სასამართლომ, 22 მარტს, Crocus City Hall-ზე განხორციელებული თავდასხმის მეათე ეჭვმიტანილს 22 მაისამდე წინასწარი პატიმრობა შეუფარდა. სასამართლოს ცნობით, ეჭვმიტანილი, იაკუბჯონი იუსუფზოდა, ტაჯიკეთის მოქალაქეა. გამოძიების ინფორმაციით, მან თავდასხმის ერთ-ერთ სავარაუდო მონაწილეს პირადი საბანკო ბარათით თანხა გადაურიცხა.
მოსკოვის ოლქის ქალაქ კრასნოგორსკში Crocus City Hall-ის საკონცერტო დარბაზში შეიარაღებულმა პირებმა ცეცხლი 22 მარტს გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა – დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა. არსებული ინფორმაციით, თავდამსხმელებმა ასევე ააფეთქეს ხელყუმბარა, რის გამოც ხანძარი გაჩნდა.
გავრცელებული ინფორმაციით, თავდასხმაზე პასუხისმგებლობა დაჯგუფება „ისლამურმა სახელმწიფომ“ აიღო. რუსეთის უსაფრთხოების ფედერალური სამსახურის ცნობით, ტერაქტის საქმეზე დაკავებულია 11 ადამიანი, მათ შორის ოთხივე ტერორისტი. სასამართლომ მათ წინასწარი პატიმრობა შეუფარდა. ბოლო მონაცემებით, ტერაქტის შედეგად დაღუპულთა რაოდენობა 144-მდე გაიზარდა.