15 წლის წინ იყო სერიოზული გამოწვევა, რომ [ციხეებში] ხალხი არ დაეხოცათ, არ გაეუპატიურებინათ, დაშლის სცენები არ ჰქონოდათ „დუბინკებით“, დღეს გვაქვს გამოწვევა, რომ 3-4 კაცში იმგვარი ლიდერი არ წარმოიშვას, რომელიც ციხის ვითომ დაუწერელი კანონებით რაღაც მართვას შეეცდება, – ასე გამოეხმაურა მამუკა მდინარაძე სახალხო დამცველის ანგარიშში აღნიშნულ ფაქტებს, რომლებიც პენიტენციურ სისტემაში არსებულ ვითარებას შეეხება.
„ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა აღნიშნა, რომ მმართველი გუნდი ყველა კრიტიკულ შენიშვნას ყურადღებით ეცნობა.
„ჩვენ ვიცით პროგრესი და ციხეებთან დაკავშირებით „ნაცმოძრაობის“ დროსთან შედარება პირადად ჩემთვის შეურაცხმყოფელია. მაგრამ ცალკეული ხარვეზები, როგორც აქ წერია, მართლა თუ არის, განსაკუთრებული ყურადღება უნდა მივაქციოთ [მათ]. ყველაზე კარგი იცით რა არის? რომ განვითარების იმ დონეს, დემოკრატიის იმ ხარისხს, ადამიანის უფლებების დაცვის იმ ხარისხს მივაღწიეთ, რომ ცალკეულ შემთხვევებთან დაკავშირებით სახალხო დამცველი თაგვის კრიტიკულ შენიშვნებს წერს. ადრე გამოწვევა იყო, რომ 100 და 200 კაცი არ მოეკლათ. ახლა კი 3 კაცში ლიდერი რომ გაჩნდა და ეს ხომ არ არის არაფორმალური შიდა მართვის, ციხის წესების ჩამოყალიბების მცდელობები – ძალიან კარგია, რომ ამასთან დაკავშირებით კრიტიკა არის, იმიტომ რომ ესეც კი უნდა აღმოვფხვრათ“, – აღნიშნა მდინარაძემ.