მოსამართლეების დასანქცირებიდან ერთი წელია გასული და კითხვა რომ დავსვა – თუ არის დღეს ცნობილი კონკრეტულად რისი გულისთვის არიან მოსამართლეები სანქცირებულები, მე პირადად არ მაქვს პასუხი, – ამის შესახებ გიორგი კახიანმა „დღის ქრონიკაში“ განაცხადა.
საქართველოს პარლამენტის ვიცე-სპიკერმა ასევე ისაუბრა იმ შედეგებზე, რაც მოსამართლეების სანქცირებას მოჰყვა.
„ვნახეთ, რა შედეგი გამოიღო უსაფუძვლო სანქცირებამ – ამ ყველაფერს რადიკალური ოპოზიცია და მასთან დაკავშირებული არასამთავრობო ორგანიზაციები იყენებენ იმისთვის, რომ გააგრძელონ სასამართლოს დისკრედიტაციის კამპანია და ამას მოჰყვება შემდეგ ვეტინგთან დაკავშირებული თემები, რაც რეალურად სასამართლოს წმენდას და სასამართლოზე გავლენის მოპოვებას გულისხმობს“, – განაცხადა კახიანმა.
მისივე თქმით, სასამართლოს წინააღმდეგ კამპანია უკვე დიდი ხანია მიმდინარეობს და მისი მიზანია სასამართლო ხელისუფლებაზე გავლენის მოპოვება.
„ბუნებრივია, ხელისუფლება ამას არ დაუშვებს. ჩვენ გვესმის სასამართლო ხელისუფლების დამოუკიდებლობის მნიშვნელობა და, ზოგადად, ამ განშტოების როლი მთლიანად სახელისუფლებო სისტემაში. ამიტომ, არავის მივცემთ იმის საშუალებას, სასამართლოზე რაღაც გავლენა ჰქონდეს და პოლიტიკური ზეწოლის ქვეშ მოაქციოს ეს ხელისუფლება. ჩვენ ბოლომდე დავიცავთ სასამართლოს დამოუკიდებლობას“, – განაცხადა კახიანმა.