აშშ-ის ეროვნული უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ განაცხადა, რომ აშშ-ის ადმინისტრაცია აღშფოთებულია ისრაელის საჰაერო თავდასხმით, რომელსაც ღაზაში ჰუმანიტარული ორგანიზაციის 7 თანამშრომელი ემსხვერპლა.
ჯონ კირბის თქმით, თეთრი სახლი გაეცნო ისრაელის პრემიერ-მინისტრისა და ისრაელის თავდაცვითი ძალების კომენტარებს, რომ ისინი გამოიძიებენ ინციდენტს და აღნიშნა, რომ ადმინისტრაცია მოელის, რომ გამოძიება ჩატარდება სწრაფად და ყოვლისმომცველად.
მანამდე ისრაელის პრემიერ-მინისტრმა, ბენიამინ ნეთანიაჰუმ აღიარა, რომ ისრაელის უნებლიე საჰაერო თავდასხმის შედეგად, ღაზაში უდანაშაულო ხალხი დაიღუპა.
„სამწუხაროდ, ბოლო 24 საათის განმავლობაში მოხდა ტრაგიკული შემთხვევა. ჩვენმა ძალებმა უნებლიეთ დაარტყეს უდანაშაულო ხალხს ღაზის სექტორში. ასეთი რამ ხდება ომში. ყველაფერს გავაკეთებთ, რომ ეს აღარ განმეორდეს“, – აღნიშნა ისრაელის მთავრობის მეთაურმა.