კანონს უკან არავითარ შემთხვევაში აღარ გავიწვევთ – ეს არის ძალიან პრინციპული საკითხი, – ასე უპასუხა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ ჟურნალისტის კითხვას, გაიწვევენ თუ არა კანონპროექტს იმ შემთხვევაში, თუ შარშანდელის მსგავსად საზოგადოებისგან პროტესტის უფრო დიდი ტალღა წამოვა.
„არავითარ შემთხვევაში! ეს არის ძალიან პრინციპული საკითხი! ჩვენი საზოგადოება არის გონიერი. ჩვენი ბრალი იყო შარშან ერთადერთი რამ, რომ კომუნიკაცია იყო პრობლემები. ერთადერთი ხარვეზი გვქონდა ჩვენ, რომ ადამიანებმა დღემდე არ იციან, რომ მხოლოდ დეკლარირების ვალდებულებაზეა საუბარი. როგორც პირადად მე ვავსებ დეკლარაციას ყოველი მომდევნო წლის დასაწყისში წინა წლის ხარჯებისა და შემოსავლების შესახებ, ასე უნდა შეავსონ უცხოური დაფინანსების მიმღებმა ორგანიზაციებმაც“, – აღნიშნა მდინარაძემ.
საპარლამენტო უმრავლესობამ მიიღო გადაწყვეტილება „უცხოური გავლენის გამჭვირვალობის შესახებ“ კანონპროექტი პარლამენტში ხელახლა წარადგინოს.