„თუ თქვენგან და ევროპიდან უმძიმესი შეფასებები არ იქნა, ქუჩაში ერთ კაცსაც ვერ გამოვიყვანთ, სასწრაფოდ გვჭირდება დახმარება” – ეს ფრაზა საქართველოს ყოფილ სახალხო დამცველს და ამჟამად სამოქალაქო მოძრაობა „საქართველოს ევროპული ორბიტის“ დამფუძნებელს, ნინო ლომჯარიას ეკუთვნის.
გუშინ საღამოს „ღია საზოგადოების ფონდში” არასამთავრობოები იყვნენ შეკრებილები და სწორედ იქ მყოფი ლომჯარია ტელეფონზე საუბრისას მაშველ რგოლს ითხოვდა.
„სოროსის ფონდის“ ხელმძღვანელმა ქეთი ხუციშვილმა კი გასცა ინსტრუქცია, რომ „აგენტის ცნება კი ამოიღეს, მაგრამ უნდა ვიძახოთ, რომ უარესი შემოიღეს”.
„ღია საზოგადოების ფონდში“ არასამთავრობო ორგანიზაციების წარმომადგენლების შეკრება „ქართული ოცნების“ საკანონმდებლო ინიციატივასთან დაკავშირებით გაიმართა, რომელიც გამჭვირვალობის კანონს უკავშირდებოდა. შეხვედრაში მონაწილეობდნენ ნინო ლომჯარია, ნინია კაკაბაძე და საქართველოს ახალგაზრდა იურისტთა ასოციაციის წარმომადგენლები.
საპარლამენტო უმრავლესობის გადაწყვეტილებით, კანონპროექტი „უცხოური გავლენის გამჭვირვალობის შესახებ“ პარლამენტში ოფიციალურად დაინიცირდა. კანონპროექტში ნაცვლად ტერმინისა „უცხოური გავლენის აგენტი“ გამოყენებულია ტერმინი – „უცხოური ძალის ინტერესების გამტარებელი ორგანიზაცია“. კანონპროექტის ყველა სხვა ჩანაწერი უცვლელია.
კანონპროექტი ითვალისწინებს ერთადერთ მოთხოვნას – უცხოური დაფინანსების მიმღები ორგანიზაციების მიერ საკუთარი ყოველწლიური ფინანსური ანგარიშის გამოქვეყნებას, რომლის დარღვევისთვისაც მხოლოდ ფინანსური სანქციებია გათვალისწინებული. კანონი სამივე მოსმენით მიმდინარე სესიის ბოლომდე იქნება მიღებული.