პარლამენტის პლენარულ სხდომაზე იურიდიულ საკითხთა საპარლამენტო კომიტეტის თავმჯდომარის, საპარლამენტო უმრავლესობის წევრის ანრი ოხანაშვილის გამოსვლა ოპოზიციამ შეაფერხა. ოპოზიციონერმა დეპუტატებმა დარბაზში წიგნების ბრახუნით და ხმაურით ოხანაშვილის გამოსვლის ჩაშლა სცადეს.
“მოსმენა არის ევროპული, მონობა არის რუსული, რასაც აკეთებთ. მოისმინეთ”, – მიმართა ოხანაშვილმა ოპოზიციონერ დეპუტატებს.
პარლამენტის თავმჯდომარემ კი ანა ნაცვლიშვილს მიმართა, წიგნი არა სარტყმელად, არამედ დანიშნულებისამებრ გამოეყენებინა.
“ქალბატონო ანა, წიგნი არის საკითხავად და არა სარტყმელად და დანიშნულებისამებრ რომ გამოიყენოთ, თქვენც წაგადგებათ და საქმესაც”, – განაცხადა პაპუაშვილმა.
პარლამენტის თავმჯდომარის მოწოდების მიუხედავად თინა ბოკუჩავამ და ანა ნაცვლიშვილმა ხმაური არ შეწყვიტეს, რის შემდეგაც ისინი შალვა პაპუაშვილის გადაწყვეტილებით სხდომათა დარბაზიდან გააძევეს.