ჩვენ ყოველ ჯერზე ვიგებთ არჩევნებს და ამ კუთხით ეს გაუმჭვირვალობა პრობლემებს არ გვიქმნის, მაგრამ ჩვენ რაზეც ვართ სხვა რაღაცებთან ერთად პასუხისმგებელი, ეს არის მშვიდი გარემოს შენარჩუნება ჩვენს ქვეყანაში. ეს პასუხისმგებლობა ბოლომდე უნდა ვატაროთ, გავიაზროთ და სწორედ ამ პასუხისმგებლობას ეფუძნება ის ინიციატივა, რომელიც წარვადგინეთ, – ამის შესახებ საქართველოს პრემიერ-მინისტრმა, ირაკლი კობახიძემ საზოგადოებრივ-პოლიტიკური თოქ-შოუების წამყვანებთან შეხვედრისას, გამჭვირვალობის კანონპროექტზე საუბრისას განაცხადა.
მისივე თქმით, თუ გამჭვირვალობა არ იქნება უზრუნველყოფილი, ისინი მათი პასუხისმგებლობის შესაბამისად ვერ იმოქმედებენ.
„ჩვენ ვერ დავიცავთ გრძელვადიან სიმშვიდეს ამ ქვეყანაში. ამიტომ არის ეს ასეთი პრინციპული და მეორე მხარეს ჩვენ გვჭირდება სათანადო დამოკიდებულების ხილვა. ჩვენ გვინდა იმის ხილვა, რომ როგორც ჩვენ გვაინტერესებს გრძელვადიანი სიმშვიდე ამ ქვეყანაში, ასევე უნდა აინტერესებდეს გრძელვადიანი სიმშვიდე ჩვენს მეგობრებსაც ამ ქვეყანაში. შეგახსენებთ, ომი როდესაც დაიწყო უკრაინაში 2022 წელს რა თქმა უნდა, საქართველოს ჰქონდა ძალიან სერიოზული რიკები და ეს რისკები დღესაც არსებობს. კითხვა რომ დაისვას, რატომ არ დაიწყო ომი საქართველოში და რატომ დაიწყო ომი უკრაინაში? ამას ხომ თავისი მიზეზები აქვს. თავისი ახსნა აქვს. თუ შენ ინარჩუნებ სწორ , მტკიცე პოზიციებს, დამოუკიდებლობას, სუვერენიტეტს, რა თქმა უნდა, ასეთ დროს მცირდება რისკები შენი უსაფრთხოების კუთხით“, – აღნიშნა კობახიძემ.
მისივე თქმით, გამჭვირვალობა არის მთავარი ინსტრუმენტი, რომ ქვეყანაში ვითარება დამშვიდდეს.
„თუ იქნება გამჭვირვალობა, ბევრად უფრო მეტად დამშვიდდება ჩვენი ქვეყანა და თავს დააღწევს ამ ე.წ. პოლარიზაციის ჩაკეტილ წრეს“, – დასძინა პრემიერმა.