ვნახე ირაკლი ღარიბაშვილის კომენტარიც და ვნახე, შემდეგ როგორ მოხდა მანიპულაცია, აბსოლუტური დეზინფორმაცია პირდაპირ ოპოზიციური არხების მხრიდან, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
როგორც პაპუაშვილმა განაცხადა, ეს უკვე ჟურნალისტური სტანდარტის დარღვევა კი არა, ჩვეულებრივი ტყუილია.
„რადიკალური „ნაციონალური მოძრაობის“ ტელევიზიები იმდენად შორს გაიჭრნენ მანიპულაციაში, რომ უნდათ თეთრისგან შავის წარმოჩენა. ვნახე ირაკლი ღარიბაშვილის კომენტარიც და ვნახე, როგორ მოხდა შემდეგ მანიპულაცია. აბსოლუტური დეზინფორმაცია პირდაპირ ოპოზიციური არხების მხრიდან. ეს უკვე ჟურნალისტური სტანდარტის დარღვევა კი არ არის. ეს არის ჩვეულებრივი ტყუილი, რომელსაც კადრულობს მედია, თუმცა გუშინ საღამოს ვნახეთ ჩვენ ისეთი სპექტაკლი, რომ ამის შემდეგ არაფერი გვიკვირს. ჩვენ ერთი აზრი გვაქვს, როგორც „ქართულ ოცნებას“, ასევე ქართულ საზოგადოებას, საზოგადოებაც სწორედ ამ აზრზე დგას, რომ მნიშვნელოვანია, ის ფული, რომელიც შემოდის საქართველოში, იყოს ნათელი, ცხადი და გამჭვირვალე ქართველი ხალხისთვის. მე არ მგონია, პლანეტაზე შეიძლება, არსებობდეს ხალხი, ვინც იტყვის, უცხოეთიდან შემოვიდეს ფული და დამიმალონ, არ მითხრან, რაში ხარჯავენ და ასე იმუშაონ. ასეთი ხალხი პლანეტაზე, წესით, არ უნდა არსებობდეს“, – განაცხადა პაპუაშვილმა.
„ქართული ოცნების“ თავმჯდომარემ, ირაკლი ღარიბაშვილმა დღეს „უცხოური გავლენის გამჭვირვალობის შესახებ“ კანონპროექტზე საუბრისას განაცხადა: „ეს ჩემი პირადი აზრია, ეს არ არის პარტიის აზრი, როდესაც ხდება ლეგალიზება უცხო ქვეყნების ინტერესების გატარებისა, მე ამას, როგორც მოქალაქე, არ მივესალმები, ჩემთვის უცხო სახელმწიფოს ინტერესების მსახურება არის ჩვენი ქვეყნის ინტერესების ღალატი“.