უჩა აბაშიძისა და მარიამ იაშვილის აღკვეთის ღონისძიების შეფარდებაზე სასამართლო ამ წუთებში მსჯელობს. პროცესი დაწყებიდან მალევე დაიხურა. მიზეზი საქმეში არსებული ინტიმური შინაარსის მტკიცებულებებია. პროკურატურა ბრალდებულებისთვის აღკვეთის ღონისძიების შეფარდებას ითხოვს.
გამოძიების ცნობით, ბლოგერმა უჩა აბაშიძემ, თავისი მეუღლის, მარიამ იაშვილის ბინა აღჭურვა შენიღბული ვიდეო-აუდიო ჩამწერი მოწყობილობებით, რომელიც მუდმივ რეჟიმში ფარულად უზრუნველყოფდა სხვადასხვა პირებთან ინტიმური კავშირის უკანონო ჩაწერას.
შინაგან საქმეთა სამინისტროს ინფორმაციით უშუალოდ უჩა აბაშიძის მეუღლე მონაწილეობდა აღნიშნულ სცენებში, ჩანაწერები კი ფაილებად ინახებოდა. ჩატარებული გამოძიებით დადგინდა, რომ აბაშიძემ და იაშვილმა განიზრახეს სხვადასხვა პირთა პირადი ცხოვრების საიდუმლოს, კერძოდ კი, ინტიმური კავშირის ამსახველი მასალების უკანონოდ მოპოვება და შენახვა. ჩამწერი მოწყობილობები დამონტაჟებული იყო საცხოვრებელი ბინის ოთახის სხვადასხვა კუთხეში, მათ შორის საყოფაცხოვრებო ნივთებსა და ტექნიკაში. ამოღებულია მობილური ტელეფონები, კომპიუტერული ტექნიკა, ფოტოაპარატი, გარე მეხსიერების ბარათები, ასევე, ვიდეო რეგისტრატორი, დრონები, ვიდეოსამეთვალყურეო კამერები, მეხსიერების ბარათები, ხმის ჩამწერი მოწყობილობა, ხმის გამაძლიერებელი მოწყობილობა. მიმდინარეობს გამოძიება.