თამაში კი არ არის, ვალდებულებაა პრეზიდენტად წოდებულის, რომ როცა წარმოადგენს ვეტოს დასაბუთებას, ამ დასაბუთებას აქვს კანონპროექტის სახე. ანუ, მან უნდა ჩაწეროს იქ რა არ მოსწონს და რა არის მისთვის მოსაღები ვარიანტი. რაღაც უნდა დაწეროს და მან თქვა, არა, არ დავწერო. ანუ, თავისი მოვალეობის შესრულებაზე თქვა უარი, – ამის შესახებ მამუკა მდინარაძემ გადაცემაში „იმედი LIVE“ სალომე ზურაბიშვილის ბრიფინგის შეფასებისას განაცხადა.
საპარლამენტო უმრავლესობის ლიდერმა და „ქართული ოცნების“ აღმასრულებელმა მდივანმა პრეზიდენტის ის ინიციატივაც შეაფასა, რომელიც გამჭვირვალობის კანონის პირველი ნოემბრიდან ამოქმედებას ითვალისწინებს.
„ანუ, პირველი ნოემბრიდან კანონი რუსული აღარ იქნება? მან აღიარა, რომ შავი ფულით დასაფინანსებელია კამპანია, რომელსაც ჰქვია „არალეგიტიმური არჩევნები“ – რასაც აკეთებდნენ 2020-ში, ISFED-მა პარალელური დათვლის მონაცემები რომ გააყალბა, მსგავსის გაკეთება უნდათ ახლაც. ამ შავი ფულით – კიდევ უფრო მეტით, ვიდრე წინა შემთხვევებში, სჭირდებათ, რომ კამპანია აიწიოს ცესკოს წინააღმდეგ, არჩევნების ლეგიტიმურობის წინააღმდეგ, რაც ძალიან რთული ამბავია. ელექტრონული არჩევნები ტარდება ამ ქვეყანაში პირველად. იქ ძალიან რთულია თქვა, რომ რაღაც ისე არ მოხდა, როგორც საჭირო იყო. ამას სჭირდება უფრო მეტი ძალისხმევა, უფრო მეტი თანხა და ამას გავაკეთებთ ჯერ უფრო მეტი შავი ფულითო და მერე ამოქმედდეს კანონიო. აღიარა მან მიზანი. დღეს საქართველოს პრეზიდენტად წოდებულმა სალომე ზურაბიშვილმა აღიარა მთავარი მიზანი – რისი გაკეთება უნდათ ამ გაუმჭვირვალე ფულით. ეს აღიარება ყურადღების მიღმა არ უნდა დაგვრჩეს და ყოველ ჯერზე უნდა ვთქვათ – რაც არ უნდა ილაპარაკონ, მთავარია, რომ მათ არგუმენტები არ წარმოუდგენიათ“, – განაცხადა მდინარაძემ.