ნახეთ, მესამე მოსმენები რამდენ ხანში მთავრდება. თუ სხვა შემთხვევებში საათობით იწელება და ახლა მორჩა ერთ წუთში, მაშინ მტყუანები ვართ, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა ლიდერმა მამუკა მდინარაძემ „ქრონიკასთან“ სატელეფონო საუბარში განაცხადა.
მდინარაძე გამოეხმაურა კრიტიკას იმის შესახებ, რომ იურიდიული კომიტეტის სხდომა თითქმის ერთ წუთში დასრულდა, სადაც კომიტეტმა „უცხოური გავლენის გამჭვირვალობის შესახებ“ კანონპროექტს მესამე მოსმენით მხარი დაუჭირა.
„სანამ ესენი [ოპოზიცია] ჟურნალისტებთან პოზირებდნენ, კომიტეტზე დააგვიანეს. არცერთი აღარ ვარგა მგონი ოპოზიციონერად. ღამე გაათენებინეს რამდენიმე ათას ადამიანს და თვითონ დააგვიანეს შენობაში შესულებმა იურიდიული კომიტეტის სხდომაზე. გააგიჟეს მართლა ის თავისი ხალხი. ახლა გამოდიან და ითვლიან წუთებსა და წამებს. რამდენ წუთშიც არ უნდა დამთავრებულიყო, არის მესამე მოსმენა. ერთ რამეს გაგახსენებთ, ქუთაისიდან პარლამენტი რომ გადმოდიოდა, ერთ-ერთი არგუმენტი იყო, რომ მაგალითად მესამე მოსმენაზე რომ ჩადიოდნენ მინისტრის მოადგილეები, 5-10 წამისთვის ჩადიოდნენ ქუთაისში და მართლა ამ დროში მთავრდებოდა. მესამე მოსმენის დროს არაფერი ხდება. ყველაზე დიდი შეიძლება თქვა, რომ ამ წინადადებაში რომ მძიმე წერია, არასწორად წერია და ხომ არ ცვლის შინაარსს და მოდი გადავიტანოთ წინ. ამ დონის შენიშვნები შეიძლება იყოს. სხდომა თავის დროზე დაიწყო, ცოტა დაგვიანებითაც კი, როგორც ხდება სხვა შემთხვევაში, ისე დამთავრდა. ნახეთ, მესამე მოსმენები რამდენ ხანში მთავრდება. თუ სხვა შემთხვევებში საათობით იწელება და ახლა მორჩა ერთ წუთში, მაშინ მტყუანები ვართ. თუ სხვა შემთხვევებშიც ერთ და ორ წუთში მთავრდება, მაშინ მართლები ვართ ყველა შემთხვევაში“, – აღნიშნა მდინარაძემ.