აშშ გადახედავს G7-ის ქვეყნებში რუსული ბრილიანტების იმპორტის აკრძალვის უმკაცრეს ელემენტებს. ინფორმაციას ამის შესახებ სააგენტო Reuters-ი ავრცელებს.
როგორც სააგენტო Reuters-ი იუწყება, აშშ-ის მიერ აკრძალვის გადახედვა განპირობებულია წინააღმდეგობით აფრიკის ქვეყნებისა და ნიუ-იორკელი იუველირების მხრიდან.
„დეკემბერში შეთანხმებული სანქციების პაკეტი, რომელიც მოიცავდა ევროკავშირის ტერიტორიაზე რუსული ბრილიანტების იმპორტის აკრძალვას, ერთ-ერთი ყველაზე დიდი შოკი იყო ინდუსტრიისთვის ბოლო ათწლეულების განმავლობაში“, – წერს სააგენტო Reuters-ი.
ორმა წყარომ განაცხადა, რომ ამერიკელები გამოეთიშენ G7-ის სამუშაო ჯგუფებს მკაცრი კონტროლის საკითხებზე.
ბაიდენის ადმინისტრაციის მაღალჩინოსანმა განაცხადა, რომ ვაშინგტონს არ შეუცვლია პოზიცია და რომ აშშ გააგრძელებს მუშაობას G7-ის ფარგლებში.
„ჩვენ გვინდა დავრწმუნდეთ, რომ სწორი ბალანსი გვაქვს რუსეთისთვის ზიანის მიყენებასა და იმას შორის, რომ ყველაფერი განხორციელებადი იყოს“, – აღნიშნა მაღალჩინოსანმა.
სააგენტო Reuters-ი აღნიშნავს, რომ ეტაპობრივი აკრძალვის ნებისმიერი შემსუბუქება მოიცავს რისკს, რომ დარჩება ხარვეზები, რაც საშუალებას მისცემს რუსულ ბრილიანტებს აღმოჩნდეს ნიუ-იორკის, ლონდონისა და ტოკიოს ბუტიკებში.
სანქციების მომხრეები ამბობენ, რომ საჭიროა თვალთვალის მექანიზმი სანდო აკრძალვის უზრუნველსაყოფად და რომ შეერთებული შტატების სრული მონაწილეობის გარეშე, რომელზეც G7-ის სამკაულის ბაზრის 50% მოდის, ის ეფექტური ვერ იქნება.