უკრაინელმა მოკრივემ, ოლექსანდრ უსიკმა მძიმე წონაში მსოფლიოს აბსოლუტური ჩემპიონის ტიტული მოიპოვა.
მან დაამარცხა ბრიტანელი მეტოქე ტაისონ ფიური და მძიმე წონაში პირველი აბსოლუტური მსოფლიო ჩემპიონი გახდა 1999 წლის შემდეგ.
ფიურის და უსიკის ბრძოლა შაბათს, 18 მაისი საღამოს საუდის არაბეთში, რიადში გაიმართა. ჩატარდა 12-ვე რაუნდი. მეცხრე რაუნდში უსიკმა ფიური ნოკდაუნში ჩააგდო, მაგრამ ბრიტანელმა მოკრივემ ბრძოლის გაგრძელება შეძლო.
ეს არის ფიურის პირველი მარცხი ჩემპიონობისკენ გზაზე. მან განაცხადა, რომ სჯეროდა, რომ მოიგო რაუნდების უმეტესობა, თუმცა მსაჯებმა გამარჯვება უსიკს მიანიჭეს ქულებით, მისი საომარ ვითარებაში მყოფი ქვეყნის მიმართ სიმპათიის გამო. მისი თქმით, მისი შემდეგი ბრძოლა უსიკთან ოქტომბერში გაიმართება.
ბრძოლის შემდეგ უსიკმა განაცხადა, რომ მისი გამარჯვება მნიშვნელოვანია არა მხოლოდ მისთვის, არამედ მთელი უკრაინელი ხალხისთვის, ქვეყნისთვის და სამხედროებისთვის, რომლებიც ახლა მას იცავენ.
უსიკს გამარჯვება უკრაინის პრეზიდენტმა მიულოცა. “უკრაინელები მაგრად ურტყამენ!” – დაწერა ვლადიმერ ზელენსკიმ თავის ტელეგრამზე.
ალექსანდრე უსიკი 37 წლისაა. 2021 წლის სექტემბერში იგი პირველად გახდა კრივის მსოფლიო ასოციაციის (WBA), კრივის მსოფლიო ორგანიზაციის (WBO), კრივის საერთაშორისო ფედერაციის (IBF) და კრივის საერთაშორისო ორგანიზაციის (IBO) მძიმე წონაში მსოფლიო ჩემპიონი. 2022 წელს მან დაიცვა ერთიანი ჩემპიონის ტიტული.