პოლონეთის პრემიერ-მინისტრმა, დონალდ ტუსკმა განაცხადა, რომ პოლონეთი არ მიიღებს ლტოლვილებს ევროკავშირის მიგრაციისა და თავშესაფრის შესახებ პაქტის ფარგლებში, რადგან მან უკვე მიიღო ათასობით ადამიანი უკრაინიდან და ბელარუსიდან.
ევროკავშირის საბჭომ სამშაბათს დაადგინა რეგულაციები, რომელიც ითვალისწინებს წევრ ქვეყნებს შორის ტვირთის სამართლიან განაწილებას ევროკავშირში თავშესაფრის მსურველთა მიღებასთან დაკავშირებით.
„მინისტრმა, რომელიც წარმოადგენს ჩემს მთავრობას, მხარი არ დაუჭირა მიგრაციის პაქტის მიღებას. პოლონეთის პოზიცია ამ საკითხთან დაკავშირებით თავიდანვე ნათელი იყო“, – აღნიშნა პოლონეთის მთავრობის მეთაურმა.
ამასთან, მისი თქმით, მოქმედმა ხელისუფლებამ ახალი კანონმდებლობის ფარგლებში პოლონეთისთვის უკეთესი პირობების მოლაპარაკება შეძლო.
ტუსკმა დასძინა, რომ ფორმა, რომლითაც საბოლოოდ მიიღეს პაქტი პოლონეთს საშუალებას აძლევს აირიდოს ყველა ნეგატიური შედეგი.
„პოლონეთი მიგრანტებს არ მიიღებს. რუსეთსა და უკრაინას შორის ომის გამო, პოლონეთმა ასობით ათასი მიგრანტი მიიღო. ჩვენ ასევე გვყავს ათიათასობით მიგრანტი ბელარუსიდან. ჩვენ არ მოგვიწევს არაფრის გადახდა, არც მიგრანტების მიღება სხვა ადგილებიდან. ევროკავშირი არ გვაიძულებს მიგრანტების რაიმე რაოდენობის მიღებას“, – დასძინა მან.