[ამერიკისგან] ფინანსურ დახმარებაზე მნიშვნელოვანი, ვფიქრობ არის ჩვენი კურსი, რა კურსითაც ქვეყანა მიდის და ეს არის ევროატლანტიკური კურსი, – ასე უპასუხა ფინანსთა მინისტრის მოადგილემ, გიორგი კაკაურიძემ ჟურნალისტების კითხვას აშშ-ის სახელმწიფო მდივნის ენტონი ბლინკენის განცხადებასთან დაკავშირებით.
ფინანსთა მინისტრის განმარტებით, ამერიკის შეერთებული შტატები მნიშვნელოვანი პარტნიორია, რის გამოც, მასთან ურთიერთობები სტრატეგიულად მნიშვნელოვანი უნდა იყოს.
„არ ყოფილა იქ [განცხადებაში] ფინანსურ სანქციებზე საუბარი. საუბარია კონკრეტულ პირებზე. [სანქცირების] გადაწყვეტილების შემდგომ, მე შემეძლება გითხრათ, რა გავლენა ექნება ამა თუ იმ გადაწყვეტილებაზე. [ამერიკისგან] ფინანსურ დახმარებაზე მნიშვნელოვანი, ვფიქრობ არის ჩვენი კურსი, რა კურსითაც ქვეყანა მიდის და ეს არის ევროატლანტიკური კურსი. იმ ფინანსურ დახმარებაზე გაცილებით მნიშვნელოვანია ის პოზიციები, რაც როგორც ევროკავშირთან, ასევე ამერიკის შეერთებულ შტატებთან გვქონდა – ის ურთიერთობა, რომელიც გვქონდა, უნდა გვქონდეს და აუცილებლად გვექნება“, – აღნიშნა კაკაურიძემ.
აშშ-ის სახელმწიფო მდივნმა, ენტონი ბლინკენმა განაცხადა: „სახელმწიფო დეპარტამენტს შემოაქვს საქართველოსთვის სავიზო შეზღუდვის ახალი პოლიტიკა, რომელიც გავრცელდება იმ პირების მიმართ, რომლებიც პასუხისმგებელი არიან ან თანამონაწილეები არიან საქართველოში დემოკრატიის შელახვაზე, ასევე, მათი ოჯახის წევრების მიმართ“.