გამოცემა BusinessInsider.de-ს ინფორმაციით, გერმანიის არმიამ Iris-T ტიპის რაკეტა დაკარგა. გამოცემის ცნობით, Iris-T ტიპის რაკეტები გერმანიის შეიარაღებული ძალების ერთ-ერთი უახლესი შეიარაღებაა.
გამოცემის წყაროების ინფორმაციით, ერთი ასეთი რაკეტა, რომლის ღირებულებაც 250 000 ევროა, დაკარგულია და ამ ფაქტს ერთდროულად რამდენიმე წყარო ადასტურებს.
„დანაკარგი სენსიტიურია იმ მხრივაც, რომ ეს რაკეტები უკრაინაშიც გამოიყენება და არსებობს შეშფოთება, რომ რუსეთმა შესაძლოა მოიპოვოს ინფორმაცია იმის თაობაზე, თუ როგორ მუშაობს Iris-T“ – წერს გამოცემა.
არსებული ინფორმაციით, რაკეტის დაკარგვის ფაქტი რამდენიმე დღის წინ ჩრდილოეთ რაინ-ვესტფალიაში დაფიქსირდა. ამჟამად მიმდინარეობს იმის დადგენა, ხომ არ აღმოჩნდა რაკეტა შემთხვევით კონტეინერმზიდზე, რომელიც ამერიკისკენ მიემართება.
კომენტარები