შეერთებულმა შტატებმა უკრაინას, რუსეთის ტერიტორიაზე მდებარე სამხედრო სამიზნეებზე „ატაკამსის“ რაკეტებით დარტყმის უფლება უნდა მისცეს, – ამის შესახებ უკრაინის პრეზიდენტმა სინგაპურში გამართულ უსაფრთხოების კონფერენციაზე განაცხადა.
ვოლოდიმირ ზელენსკიმ მადლობა გადაუხადა ჯოზეფ ბაიდენს იმისთვის, რომ უკრაინას ამერიკული იარაღით რუსეთის ტერიტორიაზე დარტყმის უფლება მისცა, თუმცა მისი თქმით, შეზღუდვები უნდა მოიხსნას შორ მანძილზე მოქმედი რაკეტების გამოყენებაზეც.
„საკმარისია ნებართვა, რომელიც მივიღეთ? არა. რატომ? იმიტომ, რომ მოგიყვანეთ აეროდრომების მაგალითი, საიდანაც რუსები ისვრიან გამუდმებით და მშვიდად არიან, რადგან იცის, რომ უკრაინა არ უპასუხებს, რადგან არ აქვს შესაბამისი სისტემები და ნებართვა“,- განმარტა ზელენსკიმ.
მისი თქმით, რუსეთი აგრძელებს შორი მოქმედების არტილერიისა და დაახლოებით 300 იარაღის სისტემის გამოყენებას საზღვრის საკუთარ მხარეს უკრაინაზე თავდასხმისთვის.
„ასე რომ, მათ აქვთ ეს იარაღი და იციან, რომ უკრაინას არ შეუძლია მათკენ მიმართოს დასავლური იარაღი, მაშინაც კი, როცა ისინი ჩვენს წინააღმდეგ ისვრიან“, – აღნიშნა ზელენსკიმ.