ძირითად კანონში, ასევე შრომის კოდექსში 17 მაისი დაწესდება ოჯახის სიწმინდისა და მშობლების პატივისცემის დღედ, როგორც ეს უკვე 10 წელია აღინიშნება და გამოცხადდება უქმე დღედ, – ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.
მისი თქმით, საყოველთაო-სახალხო განხილვის პროცესში და 17 მაისს გამართულ მასშტაბურ აქციაზე გამოიკვეთა ამ საკითხის სრული მხარდაჭერა მოსახლეობის მხრიდან, აქედან გამომდინარე პარლამენტის ვალდებულებაა, რომ შეასრულოს საქართველოს მოსახლეობის უმრავლესობის ნება.
„ჩვენ მიმდინარე საგაზაფხულო სესიის განმავლობაში, ამ კანონპროექტს განვიხილავთ პირველი მოსმენით და მივიღებთ. საშემოდგომო სესიაზე მეორე და მესამე მოსმენით იქნება მიღებული ეს პაკეტი. არის საკმარისი დრო იმისთვის, რომ ვისაც სურს იყოს მონაწილე დისკუსიისა, გახდეს ამ დისკუსიის მონაწილე. მე მინდა ხაზი გავუსვა იმ გარემოებას, რომ როგორც საყოველთაო-სახალხო განხილვის პროცესში ჩვენ ვნახეთ სრული მხარდაჭერა მოქალაქეების მხრიდან, ასევე 17 მაისს გამართულმა მასშტაბურმა აქციამ ფაქტობრივად, იყო სახალხო რეფერენდუმი ამ კანონის მხარდაჭერისა. აქედან გამომდინარე პარლამენტის ვალდებულებაა, რომ შეასრულოს საქართველოს მოსახლეობის უმრავლესობის ნება“, – აღნიშნა პაპუაშვილმა.