უცხოური ჩარევა სერიოზული საფრთხეა, რომელსაც საფრანგეთი მსუბუქად ვერ მოეკიდება, – განაცხადა საფრანგეთის ეროვნული ასამბლეის წევრმა [პარტია „ეკოლოგისტები“], ჟერემი იორდანოფმა.
საფრანგეთის პარლამენტმა ოთხშაბათს საბოლოოდ დაამტკიცა უცხოური ჩარევის წინააღმდეგ კანონი. ახალი კანონი ითვალისწინებს გავლენის ეროვნული რეესტრის შექმნას, ფინანსური აქტივების გაყინვის პროცედურასა და ალგორითმული მეთვალყურეობის ექსპერიმენტულ გაფართოებას, რომელიც ამჟამად გამოიყენება ანტიტერორისტული საქმიანობისთვის.
„ეს ოპერაციები [უცხოური ჩარევა] მიზნად ისახავს ჩვენი საზოგადოებრივი აზრის მანიპულირებას, ჩვენი საზოგადოების დესტაბილიზაციას და ჩვენი ეკონომიკისა და ჩვენი ინსტიტუტების მიმართ ნდობის შესუსტებას. ამ ჩარევას შეიძლება ჰქონდეს უამრავი ფორმა: კიბერშეტევები, დეზინფორმაციული კამპანიები, ჩარევა უნივერსიტეტებში“, – აღნიშნა ჟერემი იორდანოფმა ეროვნული ასამბლეის სესიაზე სიტყვით გამოსვლისას.
„ჩვენ ასევე მხარს ვუჭერთ პარლამენტის ინფორმირების გაძლიერებას უცხოური ჩარევის შესახებ. აუცილებელია საპარლამენტო დებატების რეგულარულად ორგანიზება, რათა ყველამ შეძლოს იმის გაგება, თუ რა გამოწვევები დევს სასწორზე“, – განაცხადა მან.