ისეთი სამარცხვინო განხილვები, როგორიც რამდენიმე დღის წინ იყო ამერიკის კონგრესში, აღარ უნდა მოხდეს, სადაც ყოფილი ქართველი დიპლომატი სამარცხვინოდ ითხოვდა, რომ უნდა დასანქცირდნენ ოჯახის წევრები და ბავშვები, – ამის შესახებ სოზარ სუბარმა „დღის ქრონიკაში“ განაცხადა. „ხალხის ძალის “თავმჯდომარემ განმარტა რას ფიქრობს აშშ-სა და საქართველოს ურთიერთობების გადახედვაზე.
„ჩვენ ვართ გულწრფელები ჩვენს პარტნიორულ ურთიერთობებში და იგივეს ველოდებით სტრატეგიული პარტნიორისგან, მაგრამ როდესაც ვხედავთ, რომ სტრატეგიული პარტნიორი აფინანსებს საქართველოში აკერმანის ტრენინგებს, რომელსაც ჩვენს ხელთ არსებული ინფორმაციით აშშ-ის ყოფილი ელჩი კელი დეგნანი ესწრებოდა და ამ ტრენინგეზე ახალგაზრდებს ასწავლიდნენ როგორ დაემხოთ ხელისუფლება; აფინანსებს ორგანიზაციას, რომელიც აყალბებს ხმების პარალელურ დათვლას და ამას იყენებს არჩევნების დელეგიტიმაციისთვის და ხელისუფლებაში ისევ აგენტურის მოსაყვანად, ამას არ ჰქვია სტრატეგიული პარტნიორობა. თუ ამის გადახედვას გულისხმობენ, ამას მივესალმებით. სხვას რას უნდა გადახედონ?“ – განაცხადა სუბარმა.