მეუფე პეტრე – ჩემ წინააღმდეგ დაწყებული ცილისწამებები, თქვენთვის ეკლესიის დისკრედიტაციას არ ნიშნავს?

„წარმოუდგენელი და მოულოდნელი იყო, რომ სინოდის სხდომა ისე ჩაივლიდა, აქცენტი მხოლოდ ჩემი უღირსებისათვის ესოდენ მკაცრი და უსამართლო განჩინების გამოცხადებით დასრულდებოდა“, – ამის შესახებ ნათქვამია ჭყონდიდის მიტროპოლიტის წერილში, რომლითაც მეუფე პეტრე სრულიად საქართველოს კათოლიკოს-პატრიარქს, უწმინდესსა და უნეტარეს, ილია მეორეს, წმინდა სინოდის მღვდელმთავრებსა და 9 მარტს გამართული სინოდის სხდომის მდივანს, მიტროპოლიტ შიოს მიმართავს.
როგორც წერილშია აღნიშნული, მას სურს, წერილის საშუალებით გასცეს პასუხი ყველა ცრუ ბრალდებას, რომელიც მის მიმართ გაჟღერდა.
„წარმოუდგენელი და მოულოდნელი იყო, რომ სინოდის სხდომა ისე ჩაივლიდა, აქცენტი მხოლოდ ჩემი უღირსებისათვის ესოდენ მკაცრი და უსამართლო განჩინების გამოცხადებით დასრულდებოდა, რაც მდივნის მიერ იქნა წაკითხული და ვეჭვობ, რომ არა მის მიერ იქნა დაწერილი ყოველივე ეს. ნუთუ დღემდე ეკლესიის დისკრედიტაციის მძიმე ფაქტები არ გვაქვს, ან ჩემგან არ გსმენიათ სინოდის სხდომაზე? ან ჩემ წინააღმდეგ დაწყებული და დაუსაბუთებელი ცილისწამებები ბრალდების სახით, თქვენთვის ეკლესიის დისკრედიტაციას არ ნიშნავს? წარმოუდგენელია, სინოდის სხდომა, რომელიც ესოდენ სკანდალური „ციანიდის საქმის“ შემდეგ იქნა ჩანიშნული და არც ამ განსაცდელზე და არც ამ განსაცდელის გამომწვევ მიზეზებზე არ გამოიკვეთა განსაკუთრებული ინტერესი, ხოლო მამაოს მიერ საპყობილიდან გამოგზავნილი წერილის წაკითხვა და მოსმენაც არ ჩათვალეთ აუცილებლად, რადგან წინასწარ, თითქოს დაკვეთით დაწერილი წინადადებებით შემოვიფარგლეთ და სრული ნდობა გამოუცხადეთ გამოძიებას, რომელშიც, როგორც მე, სინოდის წევრი, არ გეთანხმებით“, – ნათქვამია მიტროპოლიტის წერილში, რომელიც 11 მარტს არის დაწერილი, თუმცა მარტვილის წმინდა ნინოს მონასტრის წინამძღვარი, იღუმენია თამარ გამყრელიძე ფეისბუქის საკუთარ გვერდზე დღეს აქვეყნებს.
მეუფე პეტრე წერილში ასევე უარყოფს მის მიმართ წმინდა სინოდის სხდომის განჩინებით წაყენებულ ბრალდებებს, კერძოდ, საეკლესიო კანონების მუხლების მოშველიებით. მეუფე პეტრე წერილში ასევე, პირადად მიმართავს წმინდა სინოდის სხდომის მდივანს, სენაკისა და ჩხოროწყუს მიტროპოლიტ შიოს, დააკონკრეტოს, თუ ვის გულისხმობს კლირიკოსში.
„55 კანონით, კლირიკოსში ვის გულისხმობთ? ნუთუ თქვენ, წმინდა სინოდის სხდომის მდივანს, სენაკისა და ჩხოროწყუს მიტროპოლიტ შიოს, ღვთისმეტყველების დოქტორს, წმინდა ალექსი სენაკელის საფლავის მცველს, არ გესმით, რომ ჭყონდიდელი მიტროპოლიტი მსგავს ხარისხსა და ბრალდებას არ ექვემდებარება და მიმართულია განდგომილთადმი. უხერხულია, მსგავსი შეცდომების დაშვება….“, – აცხადებს მიტროპოლიტი პეტრე.