ტელეკომპანია “რუსთავი 2”-ის თანამშრომელთა გადაწყვეტილებით, წილების გადაცემის პროცესში ყველა თანამშრომელი ვერ იქნება ჩართული. აქედან გამომდინარე უნდა შეიქმნას შპს სახელწოდებით “რუსთავი 2 ჩემია”. ინფორმაციას “რუსთავი 2” ავრცელებს.
დღესვე, კოლექტივმა სამაუწყებლო კომპანიის ყველა დეპარტამენტიდან, კენჭისყრით, აირჩია წარმომადგენელი, მათ შორის ყველაზე დიდია ჟურნალისტების ჯგუფი.
კოლექტივის შემადგენლობაში არიან: ნიკა გვარამია, ზაალ უდუმაშვილი, გიორგი გაბუნია, გიორგი ლაფერაშვილი, პაატა იაკობაშვილი, ნოდარ მელძე, მაია ასათიანი, ნანუკა ჟორჟოლიანი, ვანო ჯავახიშვილი, ფორმულა კრეატივი და სხვები.
23 მარტს, ტელეკომპანია “რუსთავი 2”-ის მფლობელებმა ძმებმა ყარამანიშვილებმა განცხადება გაავრცელეს, რომელშიც ყარამანიშვილები ტელევიზიის თანამშრომლებს კომპანიის 40%-იან წილის გადაცემას სთავაზობდნენ. მოგვიანებით, “რუსთავი 2”-ის გენერალურმა დირექტორმა ნიკა გვარამიამ, არხის დამფუძნებლების შეთავაზებაზე უარი განაცხადა და თქვა, რომ 40%-იანი წილის დათმობა არსობრივად საქმის ვითარებას არ ცვლიდა, რადგან გადამწყვეტი ხმის უფლება ისევ ტელეკომპანია “საქართველოს” დარჩებოდა. 24 მარტს, ძმებმა ყარამანიშვილებმა ახალი განცხადება გაავრცელეს, რომლის თანახმადაც, ისინი მზად იყვნენ მიეცათ “რუსთავი 2”-ის წილის საკონტროლო პაკეტი ტელევიზიის თანამშრომლებისთვის. ამ ინიციატივაზე, ნიკა გვარამიამ ახალი მოთხოვნა წამოაყენა, რაც შუამავალი შპს-ს შექმნას გულიხსმობს, რომელშიც არხის 20-დან 50-მდე თანამშრომელი შევიდოდა, რომელიც გადაცემულ წილებზე იქნებოდა პასუხისმგებელი. ძმები ყარამანიშვილების შეფასებით კი შპს-ს შექმნა კომპანიისთვის არაგონივრული და დამაზიანებელია.